20-dekabr kuni kechasi Toshkent hayvonot bog‘ining bosh veterinariya shifokori va feldsher Navoiydagi xususiy hayvonot bog‘ida uzoq vaqt yomon sharoitda saqlangan hayvonlarni poytaxtga olib keldi. Bu haqda Ekologiya va atrof-muhitni muhofaza qilish davlat qo‘mitasi xabar berdi.
12-dekabr kuni ijtimoiy tarmoqlarda “Biz estetikani so‘ramadik, hayvonlarga yaxshi sharoit yaratib berishni so‘raymiz” sarlavhasi ostida Navoiydagi hayvonot bog‘iga nisbatan 70 marotaba shikoyat qilingan.
Murojaat Navoiy viloyati Ekologiya boshqarmasi davlat inspektorlari, viloyat Veterinariya va chorvachilikni rivojlantirish boshqarmasi xodimlari hamda shahar Sanitariya epidemiologiya markazi xodimlari hamkorligida 16-dekabr kuni o‘rganilgan. Navoiy shahrida joylashgan “Hayvonot bog‘i” (“Ferz Umid” MChJ)da O‘zbekiston Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish kelishuviga muvofiq tekshirish ishlari olib borilgan.
Ma’lum bo‘lishicha, hayvonlarning birortasi sanitarizatsiya qilinmagan va emlanmagan. Pasport va biologik kartalari yo‘q.
Bu harakatlar bilan “Ferz Umid”MChJ “Hayvonot dunyosini muhofaza qilish va undan foydalanish to‘g‘risida” gi qonunning 39-moddasi talablarini hamda Vazirlar Mahkamasining 2014-yil 20-oktabrdagi 290-son Hayvonot dunyosi obyektlaridan foydalanish va hayvonot dunyosi obyektlaridan foydalanish sohasida ruxsat berish tartib-taomillaridan o‘tish tartibi to‘g‘risidagi qarorning 3-bob bandlarini buzgan.
Ushbu hayvonlarning burgut, kal jo‘rchi, qora tasqara turlar O‘zbekiston “Qizil kitobi”ga kiritilgan. Shuningdek hayvonot bog‘ida bir bosh ayiq saqlanganligi ushbu bir bosh ayiq yoshi o‘tib o‘lganligi aniqlangan.
Xususiy hayvonot bog‘i (“Ferz Umid” MChJ) direktori Sohiba Barnoyeva Toshkent hayvonot bog‘iga Afrika sheri, sahro bo‘risi, jayra, nasua, to‘qay mushugi, burgut, kal jo‘rchi, ukki va ikkita qora tasqarani topshirgan.
Avvalroq Toshkent hayvonot bog‘iga karkidon va zebralar olib kelinishi to‘g‘risida xabar berilgandi.
Izoh (0)