Navoiy viloyati prokuraturasi “Mehr va oqibat” hayvonlarni himoya qilish jamiyatining murojaatiga asosan xususiy hayvonot bog‘i direktori (“Ferz Umid” MChJ) Sohiba Barnoyevaga nisbatan hayvonlarni saqlashdagi qonunbuzarligiga oid ishni ko‘rib chiqdi. Bu haqda Bosh prokuratura matbuot xizmatiga tayanib, “Gazeta.uz” xabar berdi.
Avvalroq Toshkent hayvonot bog‘ining bosh veterinariya shifokori va feldsher Navoiydagi xususiy hayvonot bog‘ida uzoq vaqt yomon sharoitda saqlangan hayvonlarni poytaxtga olib kelgani to‘g‘risida xabar berilgandi.
Bosh prokuratura ma’lumotlariga ko‘ra, 22-noyabr kuni Atrof-muhitni himoya qilish va ekologiya boshqarmasi hayvonot bog‘ida tekshiruv o‘tkazib, qushlar va hayvonlarni saqlash sharoitida kamchiliklarni aniqlagan hamda ularni bartaraf etish bo‘yicha ko‘rsatma bergan.
Hayvon himoyachilarining murojaatini ko‘rib chiqish davomida yovvoyi hayvonlar — sahro bo‘risi, jayra, nasua, to‘qay mushugi, burgut, kal jo‘rchi, ukki va ikkita qora tasqara — hayvonot bog‘ida “Hayvonot dunyosini muhofaza qilish va undan foydalanish to‘g‘risida”gi qonun talablarini buzgan holda ruxsatsiz saqlab kelingani aniqlangan.
Boshqarma mazkur fakt yuzasidan 16-dekabr kuni xususiy hayvonot bog‘i direktori Sohiba Barnoyevaga nisbatan Ma’muriy javobgarlik to‘g‘risidagi kodeksning 90-modda 1-qismi (ov qilish va baliq ovlashning taqiqlangan qurollarini yoki vositalarini tayyorlash, olib kirish, saqlash, tashish yoki yuborish, olish yoxud sotish/huquqbuzarlik quroli va ashyolarini musodara qilib, fuqarolarga bazaviy hisoblash miqdorining 5 baravaridan 10 baravarigacha, mansabdor shaxslarga esa — 10 baravaridan 15 baravarigacha miqdorda jarima solish) bo‘yicha ma’muriy ish qo‘zg‘atib, hujjatlar ma’muriy ishlar bo‘yicha shahar sudiga yuborilgan.
Izoh (0)