Buxoro viloyatining Qoraqir cho‘l hududida joylashgan Yo‘rg‘a tuvaloqlarni ko‘paytirish markazidan 200 boshdan ortiq tuvaloqlar tabiat qo‘yniga uchirib yuborildi. Bu haqda “Daryo”ga viloyat Ekologiya va atrof-muhitni muhofaza qilish boshqarmasi axborot xizmati rahbari Marjona Shukurova xabar berdi.
Ta’kidlanishicha, boshqarmaning bioxilma-xillikni asrash, raqamlashtirish va kadastrni yuritish bo‘limi mutaxassislari hamda “Amirliklarning Yo‘rg‘a tuvaloqni ko‘paytirish markazi” nodavlat-notijorat tashkiloti bilan hamkorlikda markazda yetishtirilgan yo‘rg‘a tuvaloqlar tabiat qo‘yniga qo‘yib yuborilgan.
Ma’lum bo‘lishicha, mazkur markaz tumanning Qoraqir cho‘li hududida joylashgan bo‘lib, yer maydoni 400 gektarni tashkil etadi.
Markaz Birlashgan Arab Amirliklari vitse-prezidenti, Dubay amirligining hokimi shayx Muhammad bin Roshid al-Maktum tashabbusi bilan 2008-yilda faoliyat boshlagan. Markazning asosiy faoliyati O‘zbekistonda Osiyo yo‘rg‘a tuvalog‘ining barqaror populyatsiyasini qo‘llab-quvvatlashga qaratilgan bo‘lib, shu turdagi qushlarni ko‘paytirish va asrash ishlari hamda har yili ushbu turni yovvoyi tabiiy muhitga qo‘yib yuborish kabi tadbirlarni tashkil etishdan iborat.
“Qushlarni tabiatga uchirish mavsumi asosan, sentabr-oktabr oylari hisoblanadi. Kuni kecha 200 boshdan ortiq qush tabiatga qo‘yib yuborildi. Yo‘rg‘a tuvaloqlar markazda yovvoyi tabiatda yashash, ozuqalarini topish, yirtqich hayvonlarni tanib olish va ulardan o‘zlarini yashirish ko‘nikmalariga ega bo‘ladi. Bir necha kundan keyin O‘zbekistondagi Falcon Hunting Solutions hamda Peshkudagi Arab amirliklariga qarashli nodavlat-notijorat tashkiloti bilan hamkorlikda yana ko‘psonli yo‘rg‘a tuvaloqlar yovvoyi tabiat qo‘yniga chiqarib yuboriladi”,— deydi Marjona Shukurova.
Izoh (0)