“Rakurs” podkastining yangi sonida jamoat faoli Aqida Xonim va huquqshunos Bahodir Ahmedov ishtirok etib, O‘zbekistonda ayollarning haq-huquqi va jamiyatimizda ularga nisbatan bo‘layotgan baʼzi nomaqbul munosabatlar mavzusida fikr almashildi.
“Ayollarda jurʼat shakllanyapti”
Aqida Xonim Markaziy Osiyoda O‘zbekiston birinchilardan bo‘lib shilqimlik uchun jazo qo‘llayotgani haqida gapirdi.
— Keyingi paytlarda OAVda shilqimlik holatlari uchun javobgarlikka tortilgan insonlar haqidagi xabarlarni o‘qiyapmiz. Ammo bu shilqimlik ko‘paydi degani emas, u avvaldan bo‘lgan.
Shunchaki qiz va ayollarda jurʼat shakllandi va bu haqida ayta olishyapti. Avvallari ayollar bu hodisa haqida birovga aytsa, ularning o‘zlarini ayblashardi. Menimcha, har 2-3 ayol shunday vaziyatga tushgan, ammo bu haqida gapira olmagan.
Emotsiyaga berilib, shilqimlikni sodir etayotgan shaxslarga nega 5 sutka jazo qo‘llanilyapti, deyishimiz mumkin. Ammo shu vaqtgacha bunday vaziyatlarga eʼtibor ham berilmaganini hisobga olsak, yomon natija emas. Aql-hushi joyida bo‘lgan inson 5 sutkalik jazodan o‘ziga tegishli xulosani chiqaradi, deydi Aqida Xonim.
“Ajrim — shantaj vositasi bo‘lib qolgandi”
Huquqshunos Bahodir Ahmedov raqamlarda kamaytirilgan ajrimlar va o‘zini oqlamagan yarashtiruv komissiyalari haqida gapirdi.
— Ilgari jinoyatlarni sunʼiy ravishda kamaytirish uchun ro‘yxatga olmaslik holatlari bo‘lardi. Yaʼni qaysidir hududda jinoyat ko‘tarilib ketsa, u yerdagi masʼullar ishlamayapti, deb qabul qilingan. Tabiiyki, masʼullar ishlayotganini isbotlash uchun qog‘ozdagi raqamlarni kamaytirgan. Hozir xuddi shu tartib oila institutlari tomonidan ham amalga oshirilmoqda. Bunday faoliyatni keskin qoralayman va bu o‘z-o‘zini aldashdan boshqa narsa emas deb hisoblayman. Er-xotin o‘z ixtiyori bilan ajrashishni istasa, qonunchilik tomondan taxminan 2 yilga yaqin vaqt ketardi. Bu qaysidir maʼnoda bosim o‘tkazish, shantaj vositasi ham bo‘lib qolgandi.
Endi esa er-xotin sud ostonasiga borishdan avval jiddiy o‘ylaydi, ota-onalar ham bor masʼuliyatni bolaga tashlab, o‘zi qaror qabul qilishiga qo‘yib berishadi. Er zo‘ravon bo‘lsa yoki juftliklar bir-birini tushunmasa, ularni yarashtiruv komissiyalari tomonidan majburan yashatishdan foyda yo‘q. Bu jarayonlar o‘zini oqlamagani, aksincha zo‘ravonlik holatlari ortganiga guvoh bo‘ldik.
To‘g‘ri ajrim yomon, ammo qonunchilikda davlat bunga emotsional ko‘z bilan qaramasligi kerak, deydi Bahodir Ahmedov.
Podkast davomida farg‘onalik erkak 8 yoshli (o‘g‘il bola) o‘z jiyanini zo‘rlagani, ota-ona bunga chora ko‘rmagani, Samarqandda ketma-ket kelinlar o‘limi bilan bog‘liq suidtsidlar haqida hayotiy misollar ham keltirildi.
Bundan tashqari ruhiy va jismoniy zo‘ravonlik, oilada qizlarning kamsitilishi haqida ham gapirildi. Shu bois suhbatni to‘liq video shaklida tomosha qilishingizni va o‘z fikrlaringizni izohlarda yozib qoldirishingiz mumkin.
Izoh (0)