Toshkentdan Istanbulga 20-21 va 21-22-fevral kunlari bo‘ladigan aviaqatnov bekor qilindi. Bu haqda Uzbekistan Airways xabar berdi.
Noqulay ob-havo sharoiti tufayli va Istanbul xalqaro aeroporti ma’muriyatining qaroriga ko‘ra, faqat 2025-yilning 20-21 va 21-22-fevral kunlari Uzbekistan Airways Toshkent—Istanbul—Toshkent yo‘nalishi bo‘yicha HY281/282 aviaqatnovlarini bekor qilishga majbur bo‘lmoqda.
Qaror Meteorologiya aviatsiyasini muvofiqlashtirish qo‘mitasining joriy yil 18-fevraldagi Istanbul xalqaro aeroportidagi inqirozli vaziyat bo‘yicha majburiy va tavsiyaviy talablari asosida qabul qilingan.
Shuningdek, murakkab ob-havo sharoiti va yog‘ingarchilik (qor yog‘ishi) kutilayotganini hisobga olgan holda, yo‘lovchilardan parvozga ro‘yxatdan o‘tish uchun oldinroq kelishi so‘raldi.
Bundan avval Eron ustidagi havo hududi yopilgani sabab ikki aviakompaniya O‘zbekistonga parvozlarni vaqtincha to‘xtatgan edi. Namangan aeroportida qalin tuman tufayli parvozlarni qabul qilish cheklangandi. Shuningdek, Zomin aeroporti faoliyati vaqtincha to‘xtatilgandi.
Izoh (0)