Ag‘darilgan prezident Bashar Asad hali hokimiyatda bo‘lgan paytda Suriya hukumati millionlab dollar va yevro ortilgan samolyotlarni Rossiyaga jo‘natgan. Bu haqda maxfiy hujjatlarga tayanib, Financial Times xabar berdi.
Nashr ma’lumotlariga ko‘ra, pul o‘tkazishlar 2018-2019-yillarda amalga oshirilgan va mablag‘lar Suriya Markaziy bankiga tegishli bo‘lgan. Ko‘rsatilgan davrda mamlakatda chet el valyutasining keskin taqchilligi kuzatilgan. O‘sha paytda zaxiralar “deyarli nolga teng edi”, deydi manbalar.
Shunday bo‘lsa-da, Asad hukumati Moskvaning Vnukovo aeroportiga 250 million dollarga teng bo‘lgan naqd dollar va yevro jo‘natgan — nominal qiymati 100 dollar va 500 yevroli kupyuralarning og‘irligi taxminan 2 tonnani tashkil etgani aytilmoqda.
2018-yil martdan 2019-yil sentyabrgacha valyuta tashish uchun jami 21 ta aviaqatnov amalga oshirildi. Rossiyaga olib kirilgan barcha mablag‘lar keyinchalik u yerdagi banklariga joylashtirilgan. Bundan tashqari, Asad oilasi Rossiyada yashirin ravishda aktivlar, jumladan, elita ko‘chmas mulklar sotib olgan. Xususan, ular Moskva-Sitining elita hududida qiymati kamida 40 million dollarlik 19 ta hashamatli kvartira xarid qilgan.
2018-2019-yillarda, Suriya Markaziy banki Moskvaga samolyotlarda naqd pul jo‘natayotgan paytda, Asad rejimi ko‘p jihatdan Rossiyaning harbiy yordamiga tayanardi, deb eslatadi FT.
Shu yilning noyabr oyi oxirida Suriya muxolifati, unda asosiy rolni “Hay’at Tahrir ash-Shom” guruhi o‘ynaydi, Idlib viloyatidan dastlab Suriyaning ikkinchi yirik shahri Halabga, keyin esa poytaxt Damashqqa hujum boshladi. 8-dekabr kuni qo‘zg‘olonchilar Asad rejimini ag‘darganliklarini e’lon qildi.
2000-yildan beri prezidentlik lavozimini egallab kelgan 59 yoshli Asad Suriya isyonchilar hujumi fonida Rossiyaga qochib ketdi va u yerda boshpana topdi. Bloomberg ma’lumotlariga ko‘ra, Asadni xavfsiz evakuatsiya qilishga Rossiya hukumati ko‘ndirgan, qochishni esa Rossiya razvedkasi xodimlari tashkil etgan.
Ular Suriya prezidenti va oilasini Rossiya aviabazasidan foydalanib olib chiqib ketgan. Asadni olib ketayotgan samolyotda kuzatuvdan qochish uchun transponder o‘chirib qo‘yilgan.
Prezident Vladimir Putin Rossiya maxsus xizmatlaridan Asad rejimiga tobora kuchayib borayotgan tahdidni nega juda kech payqaganlarini tushuntirishni talab qilgan, deb yozadi Kremlga yaqin bo‘lgan Bloomberg manbasi.
Dastlab, Rossiya harbiylari Suriyadagi qurolli guruhlarga zarba berib, ularni siqib chiqarishga va Asad kuchlarini mustahkamlashga harakat qilgan.
Biroq Suriya hukumat qo‘shinlari “sezilarli qarshilik ko‘rsatmagani” va isyonchilar Halab hamda Hammani egallab, strategik ahamiyatga ega Homs shahriga hujum boshlagani sababli, Rossiya Asad rejimini himoya qila olmasligini tushunib yetgan, deya ta’kidladi FT manbalari.
Izoh (0)