O‘zbekistonda mahalliy sayyohlarga keshbek sifatida qaytarilgan pul miqdori ma’lum bo‘ldi

O‘zbekistonda mahalliy sayyohlarga keshbek sifatida 177 million so‘m qaytarildi. Bu haqda Turizm qo‘mitasi xabar berdi.

Ma’lum qilinishicha, prezidentning 2022-yil 30-apreldagi “Ichki turizm xizmatlarini diversifikatsiya qilishga oid qo‘shimcha chora-tadbirlar to‘g‘risida”gi qarorida belgilangan vazifalardan kelib chiqib, Turizm qo‘mitasi Soliq qo‘mitasi bilan hamkorlikda yangi keshbek tizimini ishga tushirgan.

Mazkur tizimga ko‘ra, 2022-yil 1-sentyabrdan boshlab “O‘zbekiston bo‘ylab sayohat qil” dasturi doirasida “Sayohat qil va keshbek ishla” shiori asosida respublika hududlari bo‘ylab ichki sayohatlarni amalga oshirgan mamlakat fuqarolariga xarajatlarining bir qismi qaytarib berilmoqda.

2023-yil davomida O‘zbekiston bo‘ylab sayohatga chiqqan mamlakat fuqarolariga sarflagan xarajatlari uchun jami 177 mln so‘mdan ortiq mablag‘ keshbek sifatida qaytarib berilgan. 

Sayohat xarajatlarini qaytarish har bir turistga quyidagi miqdorlarda amalga oshiriladi:

• aviaqatnov orqali borib-kelish chiptasi narxining 15 foizi, lekin 150 ming so‘mdan oshmagan miqdorda;
• temir yo‘lda yoki avtobusda borib-kelish chiptasi narxining 15 foizi, lekin 80 ming so‘mdan oshmagan miqdorda;
• joylashtirish vositasida tunab qolish xarajatining 15 foizi, lekin 80 ming so‘mdan oshmagan miqdorda;
• teatr, muzey, sirk va badiiy galereyalarga har bir tashrif chiptasi narxining 50 foizi, lekin 20 ming so‘mdan oshmagan miqdorda.