Тошкентдан Истанбулга 20-21 ва 21-22 февраль кунлари бўладиган авиақатнов бекор қилинди. Бу ҳақда Uzbekistan Airways хабар берди.
Ноқулай об-ҳаво шароити туфайли ва Истанбул халқаро аэропорти маъмуриятининг қарорига кўра, фақат 2025 йилнинг 20-21 ва 21-22 февраль кунлари Uzbekistan Airways Тошкент—Истанбул—Тошкент йўналиши бўйича HY281/282 авиақатновларини бекор қилишга мажбур бўлмоқда.
Қарор Метеорология авиациясини мувофиқлаштириш қўмитасининг жорий йил 18 февралдаги Истанбул халқаро аэропортидаги инқирозли вазият бўйича мажбурий ва тавсиявий талаблари асосида қабул қилинган.
Шунингдек, мураккаб об-ҳаво шароити ва ёғингарчилик (қор ёғиши) кутилаётганини ҳисобга олган ҳолда, йўловчилардан парвозга рўйхатдан ўтиш учун олдинроқ келиши сўралди.
Бундан аввал Эрон устидаги ҳаво ҳудуди ёпилгани сабаб икки авиакомпания Ўзбекистонга парвозларни вақтинча тўхтатган эди. Наманган аэропортида қалин туман туфайли парвозларни қабул қилиш чекланганди. Шунингдек, Зомин аэропорти фаолияти вақтинча тўхтатилганди.
Изоҳ (0)