Suriya Markaziy bankining omborxonasida deyarli 26 tonna oltin saqlanmoqda, ammo arab respublikasining yangi hukumati unga kirish imkoniyatiga ega emas. Bu haqda Reuters xabar berdi.
Mamlakatning oltin zaxirasi hajmi 2011-yildan buyon o‘zgarmagan. Qolgan oltinning qiymati 2,2 milliard dollarga baholanmoqda. Jahon oltin kengashi ma’lumotlariga ko‘ra, avvalroq talonchilar mamlakatdagi inqirozdan foydalanib, Markaziy bankning omborxonalaridan biriga kirib, Suriya funtlarini olib ketgan.
Biroq qat’iy xavfsizlik choralari tufayli oltin zaxirasiga kirish imkonsiz bo‘lib qolmoqda: unga kirish uchun maxsus kod va turli shaxslarda saqlanadigan uchta kalit talab etiladi. Bundan tashqari, omborxona boshqariladigan portlatish urinishlaridan himoyalangan.
Asad Suriyaning 250 mln dollar pulini Moskvaga yuborgan — FT
Britaniyaning Financial Times gazetasi maxfiy hujjatlarga tayanib, 2018-2019-yillarda Suriya Markaziy bankidan Moskvaga pullar jo‘natilganini ma’lum qildi. Asad hukumati Moskvaning Vnukovo aeroportiga 250 million dollarga teng bo‘lgan naqd dollar va yevro jo‘natgan — nominal qiymati 100 dollar va 500 yevroli kupyuralarning og‘irligi taxminan 2 tonnani tashkil etgani aytilmoqda. Pullarni yetkazib berish uchun 21 ta aviaqatnov amalga oshirilgani ta’kidlangan.
Bundan tashqari, Asad oilasi Rossiyada yashirin ravishda aktivlar, jumladan, elita ko‘chmas mulklar sotib olgan. Xususan, ular Moskva-Sitining elita hududida qiymati kamida 40 million dollarlik 19 ta hashamatli kvartira xarid qilgan.
Izoh (0)