Umra-2023 mavsumining navbatdagi bosqichi bugun, 14-sentabr kuni boshlandi. Bu haqda Musulmonlar idorasi axborot xizmati xabar berdi.
Unga ko‘ra, 14-sentabr kuni Umra-2023 mavsumining navbatdagi bosqich ilk guruh ziyoratchilari Toshkent xalqaro aeroportidan Saudiya Arabistoniga jo‘nab ketdi. Har 3 kunda bir marotaba amalga oshiriladigan aviaqatnov mamlakatdan Saudiya Arabistoniga yo‘l oladi. Ziyoratchilar Madina shahrida 3 kun, Makka shahrida esa 7 kun bo‘ladi.
Mavsum davomida tajribali ishchi guruhi va imom-xatiblardan iborat guruh rahbarlari (ellikboshi) hamda malakali shifokorlar yurtdoshlarga xizmat ko‘rsatadi. Ziyoratchilar Madinada “Saraya Harmoniy”, Makka shahrida esa “Olyan Maasi” singari zamonaviy mehmonxonalarda istiqomat qilishadi. Mehmonxonalarda 3 mahal issiq ovqat, shirinlik va sarxil mevalar tortiq qilinadi.
Umra ibodatini ado etuvchilar 10 kun mobaynida ikki haramda toat-ibodat bilan mashg‘ul bo‘lish bilan birga, Makka va Madina shaharlarida muqaddas qadamjolarni ham ziyorat qilishadi.
Vazirlar Mahkamasining 2023-yil 8-avgustdagi 345-sonli “Umra tadbirlarini tashkil etish va o‘tkazishda ziyoratchilarning manfaatlarini samarali himoya qilish bo‘yicha qo‘shimcha chora-tadbirlar to‘g‘risida”gi qarori qabul qilingan edi.
Qo‘mitaning qayd etishicha, shu kunlarda ijtimoiy tarmoq sahifalarida mazkur qarordagi ayrim jihatlar bo‘yicha shaxsiy qarashlarga asoslangan noto‘g‘ri talqinlar tarqalmoqda.
“Aslida mazkur qaror asosida endilikda mamlakatimizda xususiy sektor tomonidan umra tadbirlarini tashkil etish va amalga oshirish imkoniyati yaratilayotgani keltirilgan”, — deyiladi munosabatda.
Unga ko‘ra, turistik faoliyatni amalga oshirish litsenziyasi chiqish turizmi kichik turining umra xizmatlarini ko‘rsatish faoliyati bo‘yicha quyidagi qo‘shimcha litsenziya talablari va shartlari joriy etiladi:
- 100 ming AQSH dollaridan kam bo‘lmagan mablag‘larni Turizm qo‘mitasining Xavfsiz turizm jamg‘armasiga zaxira qilib qo‘yish;
- umra xizmatlari davomida ziyoratchilarning guruh rahbari etib O‘zbekiston musulmonlari idorasi bilan tuziladigan shartnoma asosida uning diniy bilim va ko‘nikmalarga ega bo‘lgan mutaxassislarini tayinlash;
- umra xizmatlarini ko‘rsatuvchi turoperator shtatida diniy (islomiy) taʼlim yo‘nalishlari bo‘yicha respublika taʼlim muassasasi yoki O‘zbekiston xalqaro islom akademiyasining tegishli bakalavriat taʼlim yo‘nalishi yoxud magistratura mutaxassisligi bitiruvchisi bo‘lgan kamida bir nafar mutaxassisning bo‘lishi;
- umra xizmatlarini voyaga yetmagan fuqarolarga ko‘rsatmaslik;
- umra xizmatlarini Saudiya Arabistoni podshohligidagi hamkor tashkilot o‘rtasida imzolanadigan shartnomaga muvofiq amalga oshirish.
2023-yil 1-oktabrdan umra xizmatlarini ko‘rsatuvchi turoperatorlar faoliyatini reyting asosida baholash tizimi joriy etiladi. Baholash tizimi Turizm qo‘mitasining maxsus saytida eʼlon qilib boriladi.
Qarorda belgilangan qo‘shimcha litsenziya talab va shartlari 2023-yil 1-noyabrdan qo‘llanadi.
“Qarordagi umra xizmatlarini voyaga yetmagan fuqarolarga ko‘rsatish taqiqlanishi qatʼiy belgilab qo‘yilgan bo‘lsa-da, biroq mazkur jihatni turli assotsiatsiya va vakolatga ega bo‘lmagan shaxslar tomonidan shaxsiy qarashga asoslangan holda noto‘g‘ri talqin qilinishi — odamlarni chalg‘itishga sabab bo‘lmoqda. Aslida Vazirlar Mahkamasining 2023-yil 8-avgustdagi 345-sonli qaroriga muvofiq umra xizmatlarini voyaga yetmagan fuqarolarga ko‘rsatish taqiqlanadi.
O‘z navbatida, mazkur qarorni sharhlash va shaxsiy qarashni ommaga singdirish turli assotsiatsiya va shaxslarning vakolatiga kirmasligini maʼlum qilamiz”, — deya ta’kidlanadi munosabatda.
Avvalroq O‘zbekiston fuqarolari Saudiya Arabistoniga elektron viza olish imkoniga ega bo‘lgani to‘g‘risida xabar berilgandi. Ushbu viza bilan yil davomida umra hamda mamlakat bo‘ylab sayohat qilish mumkin bo‘lib, amal qilish muddati 90 kunni tashkil qiladi.
Izoh (0)