AQSH 2023-yil 7-oktyabrda G‘azo sektoriga hujum boshlanganidan beri Isroilga 50 ming tonnadan ortiq qurol-yarog‘ yetkazib berdi. Bu haqda Anadolu xabar berdi.
![](/static/2024/08/27/photo_2024-08-27_14-21-50-w-cYJrEt.jpg)
Isroil Mudofaa vazirligiga ko‘ra, 500 ta aviaqatnov va 107 ta dengiz transporti orqali harbiy asbob-uskuna va texnika yetkazib berilgan. Olingan jihozlar zirhli texnika, o‘q-dorilar, shaxsiy himoya vositalari va tibbiy uskunalarni o‘z ichiga oladi.
“Ta’minot davom etayotgan urush davrida Isroil mudofaa kuchlarining tezkor imkoniyatlarini qo‘llab-quvvatlash uchun zarur”, deyiladi xabarda.
Bundan tashqari, AQSH Isroilga 20 milliard dollardan ortiq qo‘shimcha qurol eksportini ma’qullagan. Gap 50 ga yaqin F-15 qiruvchi samolyotlari va 33 ming birlik o‘q-dorilar haqida bormoqda.
“Bu Isroilning joriy va kelajakdagi dushman tahdidlariga javob berish qobiliyatini yaxshilashi kerak”, deyiladi Davlat departament xabarida.
G‘azo sektorida 7-oktyabrdan buyon Isroil hujumi oqibatida 40 435 nafar falastinlik qurbon bo‘ldi. Ular orasida 10 980 nafar ayol va 16 589 nafar bola bor. Hujumlarda jami 93 534 kishi jarohatlangan.
Izoh (0)