Россия Президенти Владимир Путин 19 февраль куни Россия армияси Курск вилояти чегарасини кесиб ўтиб, Украина ҳудудига киргани ҳақида баёнот берди.
Менга бир соат олдин етказилган энг сўнгги маълумотга кўра, бугун тунда 810-бригада жангчилари Россия ва Украина чегарасини кесиб ўтиб, душман ҳудудига кирди, деди Путин Санкт-Петербургдаги дронлар ишлаб чиқариш заводига ташрифи чоғида журналистларга.
У Россия бўлинмалари бутун жанговар тўқнашув чизиғи бўйлаб ҳужум қилаётганини таъкидлади.
Аввалроқ Россия армияси Курск вилоятидаги Свердликово аҳоли пунктини озод қилгани ҳақида хабар берилган эди. 19 февраль куни Россия Мудофаа вазирлиги Свердликовни озод қилиш чоғида мамлакат армияси Сужа–Рилск йўлини назорат остига олгани ҳақида маълум қилди.
Путин 19 декабрдаги “Йил якунлари” тадбирида Курск вилоятидаги уй-жойлар, ижтимоий объектлар, йўл тармоғи ва инфратузилма қайта тикланишини маълум қилди. Бундан ташқари, аҳолига уйларини таъмирлаш учун сертификатлар берилиши айтилди.
2024 йил 6 августда Украина армияси Курск вилоятида ҳарбий операцияни бошлади. 12 августга келиб, 28 та аҳоли пункти Украина кучлари назоратига ўтгани ҳақида ўша пайтда вилоят губернатори вазифасини бажарувчи Алексей Смирнов хабар берди. Январь ойида Россия Мудофаа вазирлиги Украина томони минтақанинг 1268 кв. км ҳудудини эгаллаб олганини маълум қилди (Курск вилоятининг умумий майдони - 29,9 минг кв. км). Январь ойи ўрталарига келиб, Россия идораси маълумотларига кўра, 801 кв. км (63,2%) қайтариб олишга эришилган.
Киев илгари 1991 йилги чегараларга қайтиш ва Россия қўшинларини ўз ҳудудидан олиб чиқиб кетишни талаб қилган эди. Кейинчалик Зеленский йўқотилган ҳудудларни келажакда дипломатик йўл билан қайтариш мумкинлигини қайд этган.
Изоҳ (0)