Himoyalangan avtomobillar ishlab chiqarishga ixtisoslashgan Nijniy Novgorodning “Rida” tyuning kompaniyasi Aurus Komendant avtomobilining uzun zirhli versiyasini taqdim etdi. Bu haqda “Gazeta.ru” xabar berdi.
Avtomobil Aurus kompaniyasi bilan birgalikda ishlab chiqilgan. Uzaytirilgan Aurus Komendant standarti bilan solishtirganda 500 millimetrga uzunroq. U portlashga chidamli zirhli kapsula (qalinligi 7 millimetr bo‘lgan zirhli po‘lat), shuningdek, qalinligi 50 millimetr bo‘lgan zirhli oynalar bilan jihozlangan.
Avtomobil AKM avtomati va SVD snayper miltig‘i o‘qlariga bardosh bera oladi. Himoya sinfi — B6/B7. Shuningdek, yo‘ltanlamas maxsus g‘ildiraklar bilan jihozlangan.
Rossiya prezidenti Vladimir Putinning maxsus garajida 15 tagacha premium toifadagi o‘q o‘tkazmaydigan avtomobillar borligi ma’lum. Avvalroq Rossiya davlat rahbari kortejida o‘q o‘tkazmaydigan Mercedes-Benz S600 Pullman avtomobillari bo‘lgan. Ammo yetti yil oldin prezident garajida Aurus Senat paydo bo‘ldi. Aynan shu mashinada u 2018-yilda o‘z inauguratsiyasiga kelgan. Endilikda Putin faqat Rossiyada emas, balki har qanday mamlakatda faqat shu mashinada harakatlanadi.
Har bir holatda xavfsizlik xizmati prezident kortejiga qancha avtomobil kirishini hal qiladi. Vladimir Putin aynan qaysi mashinada harakatlanishi har doim jumboq bo‘lib kelgan. Bu ma’lumotlar faqat yo‘lovchi, uning shaxsiy qo‘riqchilari va ba’zi mas’ul shaxslar uchun ochiq.
An’anaga ko‘ra, kortejda birinchi bo‘lib “tozalovchi” avtomobillari, ulardan keyin bir xil bo‘lgan bir juft avtomobil harakatlanadi. Odatda kortej tarkibida har doim eng so‘nggi texnika bilan jihozlangan tez yordam avtomobili ham bo‘ladi.
Raqamlar bo‘yichachi?
Turli mamlakatlarda prezident avtomobillari bir xil bo‘lsa-da, raqamlari farq qilishi mumkin. Masalan, Xitoyda Rossiyadan kelgan kortej avtomobillariga mahalliy diplomatik vakolatxona raqamlari beriladi. Xuddi shu narsa qat’iy yo‘l harakati qoidalariga ega boshqa davlatlarda ham sodir bo‘ladi.
E’tiborlisi, prezident kortejidagi har bir avtomobilga aniq bir avtomobil raqami biriktirilmagan. Bundan tashqari, har bir mashinaning “almashtiriladigan” raqami bor. Har bir safar arafasida Rossiya maxsus xizmatlari mezbon davlat bilan birgalikda prezident kortejidan har bir transportga qanday avtomobil raqami berishni hal qiladi.
“Aurus juda qimmat. Lekin u kam miqdorda ishlab chiqariladi. Hozir chet elda ishlab chiqarila boshlandi. Masalan, Amirliklarda yig‘ish amalga oshiriladi. Amirlikdagi do‘stlarimizga bu mashina yoqadi”, degan edi Putin.
Izoh (0)