Тошкент вилоятининг Оҳангарон шаҳрида Алишер Усмонов номи билан фирибгарлик қилган 7 нафар йигит ушланиб, жиноят иши қўзғатилди. Бу ҳақда вилоят ИИББ матбуот хизмати хабар берди.
Telegram’да “Алишер Усмонов акцияси” номли гуруҳлар очиб, фуқароларни “Акцияда 20 миллион сўм мукофотга эга бўлдингиз” каби сўзлар билан алдаб, пул маблағларини ўзлаштираётган йигитлар ИИББ Киберхавфсизлик бўлими ва Оҳангарон шаҳар Ички ишлар бўлими ходимлари томонидан ўтказилган тезкор-қидирув тадбирлари натижасида қўлга олинган.
Маълум бўлишича, Оҳангарон шаҳрида яшовчи 25 ёшли (Ш.Б.) ўз хонадонида Фарғона вилоятида яшовчи 18-25 ёш орасидаги 6 нафар йигитни жалб қилган ҳолда Telegram орқали “Алишер Усмонов акцияси” номи билан 200 дан ортиқ гуруҳ очиб, фаолият юритган.
Гуруҳда фуқароларга ютуқ чиққанлиги ҳақида ёлғон маълумотлар юборилиб, ютуқни олиш учун бадал пули талаб қилинган ва турли миқдордаги пул маблағларини бошқа шахслар номидаги банк карталарига тушириб ўзлаштиргани аниқланган. Тадбир давомида мазкур хонадондан 4 дона компьютер, 11 дона телефон, Wi-Fi қурилмалари ҳамда турли банк карталари далилий ашё сифатида олинган.
Дастлабки суриштирувларга кўра, ушбу гуруҳнинг ҳар бир аъзосига алоҳида вазифа белгиланган. Бир шахс сохта чек тайёрлаб, гуруҳларни назорат қилса, бошқаси реклама тарқатиш ва гуруҳларга одам йиғиш билан шуғулланган. Шунингдек, яна бири фуқаролар билан мулоқотга киришиш вазифасини бажарган бўлса, бошқаси кунлик пул тушумларини банкоматлар орқали нақдлаштириш билан шуғулланган.
Мазкур ҳолат юзасидан ушланган шахсларга нисбатан Жиноят кодексининг 168-моддаси 3-қисми “г” банди билан жиноят иши қўзғатилди. Дастлабки тергов ҳаракатлари олиб борилмоқда.
Изоҳ (0)