Ukrainada o‘tkazilgan so‘rovnomalar mamlakat aholisining 32 foizi tinchlikka erishish uchun Rossiyaga hududiy imtiyozlar berishga rozi ekanini ko‘rsatgan. Bu haqda Reuters nashri xabar berdi.
So‘nggi bir yil ichida Ukrainada tinchlikka erishish uchun dushman tomonga hududiy imtiyoz berishga chaqiruvchilar soni ko‘paygan. Bu asosan mamlakatning Rossiyaga qarshi frontda muvaffaqiyatsizlikka uchrashi hamda mamlakatning iqtisodiy muammolar girdobida qolgani bilan bog‘liq ekani aytilgan.
Kiyev Xalqaro sotsiologiya instituti 16—22-may kunlari Ukraina nazorati ostidagi hududlarda so‘rovnoma o‘tkazgan. Undan turli hududlardan jami 1067 nafar fuqaro ishtirok etgan. Respondentlarning qariyb uchdan bir qismi hududiy imtiyozlarga rozi ekanini bildirgan.
Shuningdek, so‘rovnomada qatnashganlarning 55 foizi har qanday hududiy yon berishlarga qarshi ekanini aytgan. Tinchlikka erishish uchun Rossiya bosib olgan hududlaridan chiqib ketishi zarurligi taʼkidlangan.
Yana 13 foiz responden Rossiya uchun og‘ir bo‘lgan talablarni ilgari surgan. Unga ko‘ra Moskvadan o‘z qo‘shinini olib chiqib ketish, Qrimni ham qaytarish va reparatsiya to‘lash talab qilinadi.
Maʼlumotlarga ko‘ra, qariyb ikki yarim yil davom etgan urushda Rossiya Ukraina hududining qariyb 18 foizini egallab olgan. Sharqiy frontda Ukraina ko‘plab mustahkam pozitsiyalarini boy bergan.
Hududiy imtiyozlar deganda, asosan, 2022-yilda xalqaro hamjamiyat fikriga zid ravishda Rossiya tarkibiga kiritilgan Donetsk, Lugansk, Xerson va Zaporojye viloyatlari nazarda tutilgan. Mavjud sharoitdan kelib chiqib ukrainlarning bir qismi bu hududlarni qaytarish imkonsiz deb hisoblab, tinchlik yo‘lida ulardan voz kechishga chaqirgan.
Izoh (0)