Ukraina Vashington allaqachon Kiyevga ko‘rsatgan harbiy yordam uchun to‘lov sifatida AQSHga 500 milliard dollarlik nodir metallarni topshirishga rozi bo‘ldi. Bu haqda AQSH prezidenti Donald Tramp Fox News telekanali efirida ma’lum qildi.
Shu bilan birga, Trampning aytishicha, AQSH Rossiya bilan tinchlik kelishuviga erishish-erishmasligidan va urush natijasi qanday bo‘lishidan qat’i nazar, Ukrainaning tabiiy resurslaridan foydalanish imkoniyatiga ega bo‘lishi kerak.
Ukrainlar Rossiya bilan urushni to‘xtatish haqida bitim tuzishlari mumkin. Ular kelisha olmasliklari va bitim tuzmasliklari ham mumkin. Bir kun kelib ular rossiyalik bo‘lishi ham, bo‘lmasligi ham ehtimoldan xoli emas. Lekin sarflagan pullarimizning hammasini qaytarib olmoqchi ekanimni aytdim. Men ularga noyob yer minerallari ko‘rinishidagi 500 milliard dollar ekvivalentini xohlayotganimni ma’lum qildim. Va ular, aslini olganda, bunga allaqachon rozi bo‘lishgan, dedi Tramp.
Tramp avvalroq Ukrainaning nodir yer elementlarini Amerika yordami evaziga olishga qiziqish bildirgan edi.
Biz Ukraina bilan shunday bitim tuzmoqchimizki, unga ko‘ra, ular bizdan olayotgan narsalar evaziga bizga nodir yer elementlari va boshqa mahsulotlarni berishadi, dedi Tramp.
U nodir yer elementlari yetkazib berilishining xavfsizligini ta’minlashni istayotganini va Ukraina bu borada yordam berishga tayyor ekanligini qo‘shimcha qildi.
Biz yuzlab milliard dollar sarmoya kiritmoqdamiz. Ularda ajoyib nodir yer elementlari mavjud, deb ta’kidladi AQSH prezidenti.
Ukrainaning AQSH bilan noyob minerallarni birgalikda qazib olish bo‘yicha taklifi mamlakat prezidenti Vladimir Zelenskiy 2024-yil oktyabrda — Amerikadagi prezidentlik saylovidan oldin, Tramp va respublikachi kongressmenlarga taqdim etgan “g‘alaba rejasi”ning bandlaridan biri hisoblanadi. Bu haqda Financial Times (FT) nashri yozgan, keyinroq esa Ukraina prezidenti ofisi maslahatchisi Mixail Podolyak ushbu ma’lumotni tasdiqlagan va gap, xususan, litiy va titan konlari haqida ketayotganiga aniqlik kiritgan.
FT ma’lumotlariga ko‘ra, ushbu band hamda Yevropadagi Amerika harbiy kontingentini qisman Ukraina qo‘shinlari bilan almashtirish taklifi respublikachi nomzodni qiziqtirgan.
Izoh (0)