Rossiyaga qarshi urushda 45 100 ga yaqin ukrainalik harbiy xizmatchi halok bo‘ldi, deya ma’lum qildi Ukraina prezidenti Vladimir Zelenskiy.
Zelenskiy, bundan tashqari, Ukraina himoyachilarining 390 mingga yaqin yaralanish holati qayd etilganini aytdi.
Aniqlashtiraman: jarohatlar soni jarohatlanganlar sonidan ko‘proq, chunki yarador bo‘lib, so‘ng jang maydoniga qaytib, yana jarohatlangan odamlar bor, deya tushuntirdi u.
Zelenskiy Rossiyaning yo‘qotishlari sonini ham baholadi. Uning so‘zlariga ko‘ra, Ukrainaga hujum paytida 350 mingga yaqin rossiyalik halok bo‘lgan, yana 600-700 ming kishi yaralangan.
Dekabrda Zelenskiy Ukraina armiyasining 43 ming askari halok bo‘lganini aytgan edi
2024-yilning dekabr oyi boshida Ukraina yetakchisi urush boshlanganidan beri 43 ming nafar ukrainalik askar halok bo‘lgani, yana 370 ming nafari esa jarohatlangani haqida xabar bergan edi. U “yaradorlarning taxminan 50 foizi safga qaytishi va barcha jarohatlar, shu jumladan yengil hamda takroriy jarohatlar qayd etilishi”ni ta’kidladi.
Ochiq ma’lumotlar asosida Ukrainaning yo‘qotishlari haqida ma’lumot to‘playdigan UALosses loyihasi 63 ming nafardan ortiq halok bo‘lgan ukrainalik harbiylar haqida xabar bergan.
The Economist noyabr oyi oxirida Ukraina urush boshlanganidan beri 60 mingdan 100 ming nafargacha askarini yo‘qotgan bo‘lishi mumkinligi haqida yozgan. Nashr G‘arb razvedka xizmatlari ma’lumotlari, AQSH ma’muriyati vakillarining bayonotlari va ochiq manbalardan olingan ma’lumotlarga tayanib, yana 400 ming nafarga yaqin ukrainalik askar safga qaytishga imkon bermaydigan darajadagi jarohatlar olganini qayd etgan.
Biroz avval Ukraina prezidenti agar aholiga tinchlik olib kelishning yagona sxemasi Rossiya prezidenti Vladimir Putin bilan muzokaralar stoliga o‘tirish bo‘lsa, bunga tayyorligini aytdi.
Agar bu ukrainaliklar uchun tinchlikka erishishimiz va odamlarni yo‘qotmasligimiz mumkin bo‘lgan yagona konfiguratsiya bo‘lsa, albatta, biz bunga boramiz, dedi Zelenskiy.
Shuningdek, u hozirgi kunda Ukraina barcha hududlarni qaytarib ololmasligini va “erishish ehtimoli bo‘lmagan natija uchun millionlab odamlarni yo‘qotishi mumkin emasligini” ta’kidladi.
♦ Ukrainaning urushni tugatish shartlari
Ukraina qo‘shinlarni 1991-yil chegaralariga olib chiqishni nazarda tutuvchi “tinchlik formulasi”ni amalga oshirishni talab qilmoqda. Gap 2014 va 2022-yillarda Rossiya tomonidan u yerda o‘tkazilgan “referendumlar” va Ukrainaning Qrim, Donetsk, Lugansk, Xerson va Zaporojye viloyatlari noqonuniy anneksiya qilingani haqida ketmoqda. Moskva “tinchlik formulasi” asosida muzokaralar olib borish imkoniyatini istisno qiladi.
♦ Rossiya shartlari
Putin o‘t ochishni to‘xtatish uchun o‘z shartlarini ilgari surdi, jumladan, Ukraina qo‘shinlari o‘zini o‘zi mustaqil deb e’lon qilingan DXR, LXR, Xerson va Zaporojye viloyatlaridan olib chiqilishi, ushbu to‘rtta hudud va Qrim go‘yoki xalqaro miqyosda Rossiyaning bir qismi sifatida tan olinishi, Ukrainaning NATOga a’zolikdan voz kechishi va sanksiyalarni olib tashlash. Zelenskiy bu taklifni “ishonib bo‘lmaydigan” ultimatum deb atadi.
Izoh (0)