“G‘ishtko‘prik” chegara bojxona posti orqali qo‘shni mamlakatdan kirib kelayotgan fuqaro dorilarni yashirib o‘tmoqchi bo‘ldi. Bu haqda Toshkent viloyati bojxona boshqarmasi axborot xizmati “Daryo”ga ma’lum qildi.
O‘tkazilgan shaxsiy ko‘rik natijasida fuqaro tanasining bel va oyoq qismlariga oldindan yashirib olingan, og‘zaki so‘rovda ma’lum qilinmagan, deklaratsiya qilinmagan, xorijda ishlab chiqarilgan 116 million so‘mlik dori vositalari borligi aniqlangan.
Yana bir holatda, xorijdan “Najimov” chegara bojxona posti orqali O‘zbekistonda faoliyat olib borayotgan yakka tartibda tadbirkorning nomiga olib kelingan tovarlar bilan yuklangan yuk avtotransport vositasi belgilangan tartibda bojxona ko‘rigidan o‘tkazilgan.
“Tabiiy asal” nomli tovar xolislar ishtirokida bojxona ko‘rigidan o‘tkazilganida, bojxona nazoratiga taqdim qilinmagan, yuk kuzatuv hujjatlarida ko‘rsatilmagan, 3 turdagi 17 ming 735 dona “Bipin-T”, “Bisanar” hamda “Oksibaktotsid” nomli dori vositalari borligi aniqlangan.
Hozirda yuqoridagi holatlar yuzasidan bojxona organlari tomonidan surishtiruv harakatlari davom etmoqda.
Boshqarma tomonidan joriy yilning 9 oyi davomida qiymati 3 milliard 690 million so‘mlik 490 ming 704 ming dona sifati kafolatlanmagan dori vositalarining noqonuniy aylanmasiga chek qo‘yilgan.
Avvalroq Turkiyadagi aeroportda oltin quymalarini noqonuniy olib o‘tishga uringan 6 nafar o‘zbekistonlik ayol ushlangani ham xabar qilingan edi. Ularning yonidan har biri 110 grammlik 82 dona oltin quymalari, 18 dona o‘yin pristavkalari (Playstation), shuningdek, 3 dona smartfon topilgan.
Sud qarori bilan qo‘shimcha tekshiruv o‘tkazilganida esa ayollar jinsiy azosida 84 dona oltin quymalari yashirilgani aniqlangan. Jarrohlik yo‘li bilan chiqarib olingan oltin quymalarining umumiy og‘irligi 9,2 kilogrammni tashkil etgan.
Izoh (0)