Namanganda sodir bo‘lgan YTH oqibatida uch kishi vafot etdi. Bu haqda “Mening yurtim” telekanalida xabar berildi.
Hodisa 2024-yilning 29-oktyabr kuni sodir bo‘lgan. 19 yoshli yigit do‘stlari bilan tungi klubda spirtli ichimliklar isteʼmol qilgan. So‘ng o‘ziga tegishli bo‘lmagan mashinani Uchqo‘rg‘on—Namangan yo‘lida boshqarib, yo‘lda Cobalt bilan to‘qnashgan. Oqibatda Cobalt’da bo‘lgan uch kishi vafot etgan.
Dastlabki surishtiruvlarda maʼlum bo‘lishicha, yigit haydovchilik guvohnomasiga ega bo‘lmagani va mashinani tezlik soatiga 60 km bo‘lgan joyda 100 km tezlikda boshqargani aniqlangan.
Jinoyat ishlari bo‘yicha Uychi tuman sudida o‘tkazilgan sud majlisida yigitga nisbatan to‘plangan hujjatlar ko‘rib chiqilgan.
Sud uni Jinoyat kodeksining 266-moddasi 3-qismi “a” bandi (transport vositalari harakati yoki ulardan foydalanish xavfsizligi qoidalarini buzib odamlar o‘limiga sabab bo‘lish) bilan aybdor deb topgan. Unga 6 yil qamoq jazosi belgilangan.
Avvalroq Farg‘onada Damas’ni boshqargan voyaga yetmagan bola BYD bilan to‘qnashib, vafot etgani haqida xabar berilgan edi.
O‘zbekistonda 2024-yilda 9364 ta yo‘l-transport hodisalari sodir bo‘lgan. Buning oqibatida 2203 kishi vafot etgan, 8901 nafari tan jarohati olgan.
Izoh (0)