“O‘g‘limni rulda bo‘lgan deb nohaq jazolashdi”. Xorazmdagi Damas va Tracker to‘qnashuvi bilan bog‘liq mashmasha

Xorazm viloyatida yashovchi Shuhrat Rajabov “Daryo”ga murojaat qilib, o‘g‘li Jumaniyoz Otaboyev 2024-yilning 11-iyun kuni Xiva—Urganch yo‘lida YTHga uchrab, bosh soha, ko‘krak qafasi, tos sohalaridagi og‘riqlar, chap tizza bo‘g‘imidagi og‘riq va harakat cheklanishi kabi muammolarga duch kelganini, shunga qaramasdan, sud tomonidan rul boshqaruvida bo‘lgan degan ayblov bilan nohaq ayblanib, javobgar qilinganini aytmoqda.

O‘g‘lim Jumaniyoz Otaboyev 2024-yilning 11-iyun kuni Xorazm viloyatining Xiva—Urganch yo‘lida avtohalokatga uchradi. Bu YTH videotasvirlarga tushib qolgan. Shunga qaramasdan, tergov jarayonida o‘g‘limni aybdorga chiqarishdi. Sudda ham o‘g‘lim aybdor deb topilib, javobgar qilindi, deydi murojaatchi Shuhrat Rajabov.

Murojaatchining aytishicha, YTH tasvirga tushib qolgan kadrlarda Damas haydovchisi ro‘paradagi mashinaga borib urilishidan oldin o‘zi tomonni olib qochgan va yo‘lovchi o‘tirgan tomon bilan borib urilgan.

O‘sha avariyada o‘g‘limning 8 ta joyi singan. YTH videosiga eʼtibor berilsa, Damas haydovchisi ro‘paradan kelayotgan mashinaga o‘zi tomondan emas, yo‘lovchi o‘tirgan tomon bilan urilgan. Haydovchi odatda har doim o‘zini olib qochishi va yo‘lovchi o‘tirgan tomon bilan YTH sodir etishini ko‘pchilik, ayniqsa, haydovchilar yaxshi biladi. O‘sha kungi holatda ham haydovchi shunday yo‘l tutgan. YTH natijasiga qarasak, o‘g‘lim rulda o‘tirgan deyilyapti va sakkizta joyidan sinyapti. YTHdan keyin yurolmay qolyapti. Yonida yo‘lovchi sifatida o‘tirgan, yaʼni Damas’ning Tracker’ga urilgan tomonida bo‘lgan yo‘lovchiga esa hech narsa qilmayapti. Shunday bo‘lishi mumkinmi?, deydi murojaatchi ota.

Shuhrat Rajabov mazkur YTH voqeasini tergov qilgan organ va sud o‘g‘lini nohaq aybdor qilayotganini, bu masalada keltirayotgan dalillari ahamiyatsiz qoldirilganini tushuntirmoqda.

Tergov organi va sud o‘g‘limni nohaq aybdor qilgani uchun suddan qayta ekspertiza qilishni iltimos qildik. Advokatim ham bu haqda sudyaga iltimosnoma kiritdi. Biroq sud buni rad etdi. Biz qayta ekspertizada o‘g‘lim olgan tan jarohati va Damas’ning pachaq bo‘lgan joylarini solishtirib, o‘g‘limga jarohat qanday yetkazilganiga aniqlik kiritishni maqsad qilgan edik. Shuningdek, qon izlarini olib tahlillar qilishni so‘ragandik. Bunga hech kim eʼtibor ham bermadi. Iltimosnomamizni rad etdi, deydi ota.

Murojaatchiga ko‘ra, sudda ishtirok etgan guvohlar uning o‘g‘lining oyog‘i avtomobilning pachaq bo‘lgan qismiga kirib qolganini, uni tortib olisholmaganini aytgan.

O‘sha kuni sudga olib kelishgan guvohlarning ichida IIBda ishlaydigan guvoh ham bor ekan. U “Mashina ag‘darilgan paytda ikki bola bir-birining ustida yotgandi. Biz ularni tortib oldik, ularni tortib olayotgan paytimizda ulardan biri qaymoqrang biri esa ko‘k rangdagi shimda ekan. Ko‘k rangli shim va krassovka kiygan bolaning oyog‘i torpedaga tiqilib qolgan ekan. O‘sha paytda tortib ololmadik. Keyin yonimizga kimdir kelib, yordam bergani uchun biz mashinaning torpedasini sindirib, bolani chiqarib olganmiz”, deb ko‘rsatma bergan. O‘sha kuni YTH sodir bo‘lgan paytda mening o‘g‘lim ko‘k shim va krossovkada bo‘lgan. Bu guvohning aynan shu so‘zini sudda sudya inobatga olmadi. Men keyin mashinaga eʼtibor berib qarasam rostdan ham “torpeda”ning yo‘lovchi tomoni singan edi. Shunga qaramasdan, sudda mashina boshqaruvida o‘g‘lim bo‘lgani, yonidagi faqatgina boshidan jarohat olgan bola esa yo‘lovchi bo‘lgan degan xulosaga kelishyapti, deydi Shuhrat Rajabov.

Shikoyatchining qo‘shimcha qilishicha, mazkur YTH bilan bog‘liq sud jarayonlari ularning advokatlarisiz, ularsiz davom ettirilgan.

Sudya, prokuror va ichki ishlar xodimlari bitta mashinada kelib, bitta mashinada qaytishadi. Ularning qay biri sudya, qaysi prokuror bilib ham bo‘lmaydi, deydi sudning adolatiga shubha qilayotgan ota.

“Daryo” voqealar rivojini kuzatishda davom etadi.