Farg‘ona viloyati Beshariq tumanida odamlar o‘limiga sabab bo‘lgan ikki nafar haydovchiga sud hukmi o‘qildi. Bu haqda IIV Yo‘l harakati xavfsizligi xizmati xabar berdi.
Qayd etilishicha, 2023-yil 10-dekabr kuni Beshariq tumanida tashkil etilgan qishloq xo‘jaligi xodimlari kuni tadbiriga borgan fuqaro Q.ni Yaypan—Rapqon yo‘nalishida harakatlanayotgan Damas mashinasi urib yuborgan. Oqibatda piyoda og‘ir tan jarohatlari olib, shifoxonada vafot etgan.
O‘tkazilgan sud avto-texnik ekspertiza xulosasiga ko‘ra, haydovchi piyoda yo‘lning o‘rtasida turganini 20 metr uzoqlikdan ko‘rgan bo‘lsa ham Damas’ni o‘z vaqtida to‘xtatib qola olmagan.
Yaqinda o‘tkazilgan sud majlisida marhumning vakili haydovchidan moddiy va ma’naviy zarar olmasligini hamda unga qonuniy chora ko‘rilishini so‘ragan.
Sud haydovchini Jinoyat kodeksining 266-moddasi 2-qismi bilan aybdor deb topgan. Uni barcha turdagi transport vositalarini boshqarish huquqidan mahrum qilgan holda 4 yilga ozodlikdan mahrum etish jazosini tayinlangan.
Yana bir holatda Beshariq—Navkat yo‘nalishida harakatlanib kelayotgan “ZIL-130” yuk mashinasi yo‘lning chap tomoniga burilayotib Matiz mashinasini o‘tkazib yubormagan va YTH sodir etgan.
Oqibatda Matiz mashinasida bo‘lgan uch kishi tan jarohatlari olgan, bir kishi voqea joyida vafot etgan.
Sud “ZIL” haydovchisini Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi bilan aybdor deb topgan. “ZIL” haydovchisi marhumning dafn marosimi va Matiz’ni ta’mirlash uchun 128 million so‘m to‘lab bergani va boshqa holatlar inobatga olingan.
Sud “ZIL” haydovchisini 3 yil transport vositalarini boshqarish huquqidan mahrum qilgan holda, unga 2 yil ozodlikdan mahrum etish jazosini tayinlagan.
Bundan oldin Toshkentda sodir bo‘lgan yo‘l-transport hodisasi oqibatida bir kishi vafot etgani, Surxondaryoda odam o‘limi bilan bog‘liq avariya sodir bo‘lgani, Toshkentda Tesla hamda Lacetti bir-biri bilan to‘qnashgani to‘g‘risida xabar berilgandi.
Izoh (0)