ISHIDning Xuroson bo‘limi terrorchilik guruhi 23-iyun kuni Dog‘istonda sodir etilgan teraktlar yuzasidan bayonot berdi. Bu haqda The Khorasan Diary xabar berdi.
Kavkazlik birodarlarimiz hali ham kuchli hamda nimalarga qodir ekanliklarini ko‘rsatdilar, — deyiladi Xuroson bo‘limi bayonotida.
Amerika urushni o‘rganish instituti (ISW) taʼkidlaganidek, ushbu bayonotda Xuroson bo‘limining terrorchilik xurujlariga aloqadorligi ko‘rsatilmagan. Shuningdek, Kavkaz haqida so‘z yuritilishi hujum uchun javobgarlik ISHIDning Shimoliy Kavkazdagi filiali “Viloyati Kavkaz” zimmasida ekanligiga ishora qilgan.
“Viloyati Kavkaz” 23-iyun kuni Dog‘iston Respublikasidagi cherkovlar, sinagogalar va huquq-tartibot idoralariga murakkab va muvofiqlashtirilgan hujum uyushtirgan bo‘lishi mumkin, — deya xulosa qilgan ISW.
ISW taʼkidlashicha, Shanxay hamkorlik tashkilotining (SHHT) mintaqaviy aksilterror tuzilmasi avvalroq ISHID Crocus City Hall’dagi teraktdan so‘ng “Viloyati Kavkaz” jangarilarini faollashtirishga urinayotgani haqida ogohlantirgan.
2015-yil iyun oyida tashkil etilgan “Viloyati Kavkaz” ISHID bo‘limi avvalroq Kavkaz va Rossiyaning boshqa mintaqalarida qator shov-shuvli teraktlar sodir etish uchun javobgarlikni o‘z zimmasiga olgan edi. 2017-yilda guruh Rossiya Milliy gvardiyasining Chechenistondagi harbiy qismiga hujum qilib, olti nafar harbiyni o‘ldirganini e’lon qilgan edi. 2019-yilda terrorchilar 2018-yilning 31-dekabr kuni Magnitogorskdagi turar joy binosida portlash sodir etib, 39 kishi halok bo‘lganini aytishgan. Shuningdek, 2019-yilda guruh Checheniston rahbari Ramzan Qodirovning Grozniydagi qarorgohi yaqinida politsiyaga hujum qilganini da’vo qilgan edi.
24-iyun kuni jangarilarning ikki guruhi Derbent va Maxachqal’adagi cherkov va sinagogalarga, shuningdek, politsiya xodimlari va Rossiya Milliy gvardiyasi xodimlariga hujum qildi. Rossiya Tergov qo‘mitasi maʼlumotlariga ko‘ra, teraktlar oqibatida 19 kishi halok bo‘lgan, ulardan 15 nafari huquq-tartibot xodimlaridir.
Izoh (0)