Vayronkor zilzilalardan so‘ng Turkiya hukumati 341 kishini hibsga oldi — ular binolarni qurish vaqtidagi talonchilik va qoidabuzarliklarda ayblanmoqda, deb xabar berdi TRT Haber.
Zilziladan jabr ko‘rgan 11 viloyatda qulagan yoki shikastlangan binolar bo‘yicha olib borilgan Bosh prokuratura tekshiruvlari natijasida 564 kishining qurilishdagi qoidabuzarliklari aniqlanib, 160 nafari qo‘lga olingan, yana 132 nafarini qo‘lga olish yoki qamash uchun order berilgan.
282 kishi talonchilikda ayblanib, ulardan 181 nafari hibsga olingan.
Turkiya prezidenti Rajab Toyyib Erdo‘g‘onning so‘zlariga ko‘ra, zilziladan jabr ko‘rgan hududlarda qurilish ishlari mart oyida boshlanadi. 11 viloyatda — Adana, Adiyaman, Diyarbakir, Gaziantep, Xatay, Qahramanmarash, Kilis, Malatya, Osmaniya, Shanliurfa va Elyazig‘da 200 mingga yaqin turar joy binolari qurilishi rejalashtirilgan.
Erdo‘g‘on zilzila zonalarida biznes va investitsiyalarni qo‘llab-quvvatlash uchun jami 20 milliard turk lirasi (1 milliard dollar) miqdorida yordam ko‘rsatilishini va kredit kafolat jamg‘armasi hajmini 250 milliard liradan (13,2 milliard dollar) 350 milliardga (18,5 milliard dollar) oshirishni maʼlum qildi.
“Uy-joy, ish o‘rinlari, sanoat, qishloq xo‘jaligi, tarixiy va madaniy qadriyatlari bo‘lgan barcha shaharlarimiz to‘liq tiklanadi. Yangi binolar uch yoki to‘rt qavatdan baland bo‘lmaydi”, — deb tushuntirdi u.
Shu orada Istanbul meri Ekrem Imomag‘lu metropoliyadagi qulash xavfi eng yuqori deb tasniflanayotgan uylarni buzish boshlanganini e’lon qildi.
Fevral oyi boshidan beri Turkiyada bir nechta kuchli zilzilalar sodir bo‘ldi. Birinchi kuchli zilzila yuz bergan 6-fevraldan beri 7 000 dan ortiq yer silkinishlari qayd etilgan. 20-fevral oqshomida Turkiyaning janubi-sharqida, Xatayda ikkita yangi zilzila yuz berdi.
Jahon sog'liqni saqlash tashkiloti (JSST) ma’lumotlariga ko‘ra, zilziladan jabrlanganlarning umumiy soni 23 million kishini tashkil etadi. Iqtisodiy zarar, dastlabki ma’lumotlarga ko‘ra, 20 milliard dollardan oshgan.
Izoh (0)