Ijtimoiy tarmoqlarda avvalroq Rossiya fuqarosi deb taxmin qilingan shaxsning o‘zbeklarga nisbatan shovinistik va ochiq haqoratomuz bayonotlari aks etgan video tarqalgan edi. O‘zbekiston Respublikasi Tashqi ishlar vazirligi matbuot kotibi Axror Burxanov ushbu holat yuzasidan munosabat bildirdi.
Javob berishni boshlashdan oldin media kun tartibini diplomatik kun tartibdan ajratish zarurligini taʼkidlamoqchiman. Vaqti-vaqti bilan OAVlarining kun tartibida baʼzi voqealar yoki bayonotlar tufayli shovqinlar paydo bo‘ladi. Lekin ular voqelikni to‘g‘ri aks ettira olmasligi, baʼzan esa uni juda buzib ko‘rsatishi mumkin, deydi TIV vakili.
Burxanov shu munosabat bilan OAV va bloglar olami vakillarini tasdiqlanmagan materiallarni tarqatmaslikka chaqirib, vazirlik hamkorlikka doim ochiqligini ta’kidladi:
Videoning o‘ziga kelsak, albatta, qaysi millatga mansub bo‘lishidan qatʼi nazar, xalqimizga qarata aytilayotgan bunday gaplarni mutlaqo qabul qilib bo‘lmaydi. O‘zbekiston o‘z fuqarolarining huquqlari, shaʼni va qadr-qimmatini qayerda bo‘lishidan qatʼi nazar doimo himoya qilgan va himoya qiladi.
Matbuot kotibining qayd etishicha, vazirlik tomonidan axborot maydoni muntazam ravishda kuzatib borilmoqda. Xususan, ushbu video internetda topilishi bilanoq Rossiya tomoniga diplomatik kanallar orqali zudlik bilan murojaat qilingan.
Tabiiyki, Rossiya tomoni shu zahotiyoq “Bunday haqoratomuz bayonotlar, kim tomonidan aytilishidan qatʼi nazar, chuqur afsuslanarliligi”ni taʼkidladi. Tekshiruvlar natijasida ushbu material provokatsion xususiyatga ega bo‘lib, xalqlarimiz o‘rtasidagi munosabatlarga nizo keltirib chiqarishga urinayotgan buzg‘unchi kuchlar tomonidan to‘qib chiqarilgani maʼlum bo‘ldi, deydi u.
Rossiya tomonining xabar berishicha, videoda tilga olingan shaxs Rossiya fuqarosi emas. Hozirda Rossiyaning rasmiy OAVlari ham bu borasida qator materiallarni eʼlon qilmoqda.
Yana bir bor barchaga har qanday axborot materialini tarqatishda masʼuliyat bilan yondashish zarurligini eslatib o‘tamiz. Tasdiqlanmagan manbalardan olingan kontentni targ‘ib qilishni nomaqbul deb hisoblaymiz.
Rossiya TIV vakili Mariya Zaxarovaga ko‘ra, FXX mazkur erkakning shaxsini aniqlagan: u Nikolay Nikolayevich Kochmarik. Bayonotda u ukrainalik ekani iddao qilingan.
Izoh (0)