Bangladesh harbiy-havo kuchlarining o‘quv samolyoti mamlakat poytaxti Dakkadagi maktab hududiga qulashi oqibatida kamida 19 kishi halok bo‘ldi, 150 dan ortiq odam jarohat oldi.
Rasmiy manbalar halok bo‘lganlar va jarohatlangan kishilar soni haqida turli ma’lumotlar keltirayotgani sababli, qurbonlar soni oshishi mumkin.
Guvohlarning aytishicha, samolyot to‘g‘ridan-to‘g‘ri Milestone School and College nomli ikki qavatli maktab binosiga urilgan. Uttara shimoliy tumanidagi maktabning kuzatuv kameralaridan olingan tasvirlarda halokat sodir bo‘lgandan so‘ng kuchli yong‘in va qalin tutun ko‘rinib turibdi.
Milliy kuyish va plastik jarrohlik instituti shifokorining jurnalistlarga xabar berishicha, 50 dan ortiq kishi — bolalar va kattalar kuyish jarohatlari bilan kasalxonaga yetkazilgan.
Voqea joyidan olingan suratlarda o‘nlab qutqaruvchilar tirik qolganlarni izlab, kuygan vayronalarni titkilayotgani, atrofdagi binolarga chiqib olgan tomoshabinlarning ulkan olomoni esa voqealarni kuzatib turgani ko‘rinadi.
Harbiylar hodisada ularning samolyotlaridan biri ishtirok etganini tasdiqlagan.
“Bangladesh harbiy-havo kuchlarining F-7 BGI o‘quv samolyoti Uttarada halokatga uchradi. Samolyot soat 13:06 da parvozga chiqqan”, deya ma’lum qilindi Harbiy havo kuchlari bayonotida.
Poytaxtdagi aviabazadan ko‘tarilgan uchuvchi, mexanik nosozlik yuz berganidan so‘ng, samolyotni aholi kam yashaydigan hududga yo‘naltirishga uringan, biroq uddalay olmagan.
Mamlakat yong‘in xavfsizligi xizmati ma’lum qilishicha, voqea joyida to‘qqizta bo‘linma va oltita tez yordam mashinasi ishlamoqda. Hodisani tekshirish uchun maxsus komissiya tuzilgan.
Bangladesh muvaqqat hukumati rahbari Muhammad Yunusning ta’kidlashicha, hukumat hodisa sabablarini o‘rganish va “har tomonlama yordam ko‘rsatish” uchun “zarur choralarni” ko‘radi.
“Bu butun millat uchun chuqur qayg‘uli damdir. Men jarohatlanganlarga tezroq sog‘ayib ketishlarini tilayman va barcha davlat idoralariga, jumladan, tegishli shifoxonalarga vaziyatga jiddiy yondashishni topshiraman”, deya yozdi u X ijtimoiy tarmog‘idagi xabarida.
Ta’kidlanishicha, 22-iyul Bangladeshda motam kuni deb e’lon qilindi, butun mamlakat bo‘ylab milliy bayroq tushiriladi.
Izoh (0)