Norvegiya politsiyasi Latviya rasmiylarining so‘roviga ko‘ra, Boltiq dengizidagi suvosti aloqa kabelini buzganlikda gumon qilib, Rossiya ekipaji bilan Silver Dania kemasini qo‘lga oldi.

Kema Tromsyo portiga yetkazildi, deya xabar berdi politsiya.

Huquq-tartibot idoralari xodimlari Silver Dania bortida tintuv o‘tkazmoqda, shuningdek, dalillarni to‘plash bilan shug‘ullanmoqda. Sankt-Peterburg va Murmansk o‘rtasida harakatlanayotgan kema Norvegiyada ro‘yxatdan o‘tgan, uning egasi Norvegiya yuridik shaxsi hisoblanadi.

Silver Sea rahbari noqonuniy faoliyatda aloqadorligini rad etdi

Silver Sea kompaniyasi rahbari har qanday noqonuniy faoliyat bo‘yicha ayblovlarni rad etdi.

Biz Gotland yonidan suzib o‘tdik, lekin langar tashlamadik, deydi Tormod Fossmark.

Uning so‘zlariga ko‘ra, Norvegiya hukumati kemani kabelning shikastlanishiga aloqadorlik bo‘yicha shubhalarni olib tashlash uchun portga olib kelgan.

Latviya va Shvetsiya o‘rtasidagi kabel shikastlanishi

Joriy yilning 26-yanvar kuni Boltiq dengizida Latviyaning Ventspils shahri va Shvetsiyaning Gotland orolini bog‘laydigan optik tolali kabel shikastlangan. Latviya harbiylari voqea sodir bo‘lgan joy yaqinida bo‘lgan Michalis San kemasini tekshirgan, ammo palubada shubhali harakatlar yoki langar shikastlanishini aniqlamagan. Panama bayrog‘i ostidagi kema Rossiyaga yo‘l olgan edi.

Shvetsiya prokuraturasi, o‘z navbatida, “keng ko‘lamli diversiya” fakti bo‘yicha tergov boshlagan va voqeaga aloqadorlikda gumon qilingan Vezhen kemasini hibsga olgan. Vesselfinder manbasiga ko‘ra, ushbu kema bir necha kun oldin Rossiyaning Ust-Luga portidan chiqib ketgan va Gotland hamda Latviya o‘rtasidagi hududda bo‘lgan vaqtida aloqa kabeli shikastlangani taxmin qilinmoqda.

So‘nggi oylarda Boltiq dengizida muhim telekommunikatsiya va energetika kabellariga bir necha bor shikast yetdi. Bir qator ekspertlar va siyosatchilar buni Rossiya topshirig‘i bilan uyushtirilgan va Rossiyaning “xufiyona floti” yordamida amalga oshirilgan hujumlar deb hisoblamoqda.

AQSH va Yevropa ittifoqi razvedka xizmatlari mojarolar Rossiya tomonidan qo‘poruvchilikning natijasi emas, balki tasodif ekanligi haqida xulosaga keldi, deb xabar berdi The Washington Post anonim suhbatdoshlariga tayanib.