Ижтимоий тармоқларда аввалроқ Россия фуқароси деб тахмин қилинган шахснинг ўзбекларга нисбатан шовинистик ва очиқ ҳақоратомуз баёнотлари акс этган видео тарқалган эди. Ўзбекистон Республикаси Ташқи ишлар вазирлиги матбуот котиби Ахрор Бурханов ушбу ҳолат юзасидан муносабат билдирди.
Жавоб беришни бошлашдан олдин медиа кун тартибини дипломатик кун тартибдан ажратиш зарурлигини таъкидламоқчиман. Вақти-вақти билан ОАВларининг кун тартибида баъзи воқеалар ёки баёнотлар туфайли шовқинлар пайдо бўлади. Лекин улар воқеликни тўғри акс эттира олмаслиги, баъзан эса уни жуда бузиб кўрсатиши мумкин, дейди ТИВ вакили.
Бурханов шу муносабат билан ОАВ ва блоглар олами вакилларини тасдиқланмаган материалларни тарқатмасликка чақириб, вазирлик ҳамкорликка доим очиқлигини таъкидлади:
Видеонинг ўзига келсак, албатта, қайси миллатга мансуб бўлишидан қатъи назар, халқимизга қарата айтилаётган бундай гапларни мутлақо қабул қилиб бўлмайди. Ўзбекистон ўз фуқароларининг ҳуқуқлари, шаъни ва қадр-қимматини қаерда бўлишидан қатъи назар доимо ҳимоя қилган ва ҳимоя қилади.
Матбуот котибининг қайд этишича, вазирлик томонидан ахборот майдони мунтазам равишда кузатиб борилмоқда. Хусусан, ушбу видео интернетда топилиши биланоқ Россия томонига дипломатик каналлар орқали зудлик билан мурожаат қилинган.
Табиийки, Россия томони шу заҳотиёқ “Бундай ҳақоратомуз баёнотлар, ким томонидан айтилишидан қатъи назар, чуқур афсусланарлилиги”ни таъкидлади. Текширувлар натижасида ушбу материал провокацион хусусиятга эга бўлиб, халқларимиз ўртасидаги муносабатларга низо келтириб чиқаришга уринаётган бузғунчи кучлар томонидан тўқиб чиқарилгани маълум бўлди, дейди у.
Россия томонининг хабар беришича, видеода тилга олинган шахс Россия фуқароси эмас. Ҳозирда Россиянинг расмий ОАВлари ҳам бу борасида қатор материалларни эълон қилмоқда.
Яна бир бор барчага ҳар қандай ахборот материалини тарқатишда масъулият билан ёндашиш зарурлигини эслатиб ўтамиз. Тасдиқланмаган манбалардан олинган контентни тарғиб қилишни номақбул деб ҳисоблаймиз.
Россия ТИВ вакили Мария Захаровага кўра, ФХХ мазкур эркакнинг шахсини аниқлаган: у Николай Николаевич Кочмарик. Баёнотда у украиналик экани иддао қилинган.
Изоҳ (0)