AQSHdagi sudlar Donald Trampning yangi prezidentlik muddati boshlanganidan buyon 75 foiz holatda uning raqiblarining da’volarini qo‘llab-quvvatlagan. Bu haqda The Washington Times gazetasi xabar bermoqda.
“Tramp AQSH Kongressini bo‘ysundirishga erishdi, o‘zining kuchli dasturini amalga oshirishda byurokratiyani sezilarli darajada jilovladi, biroq federal sudyalar unga yon bermaslikka qaror qilishdi”, deyiladi maqolada.
Ma’lum qilinishicha, Tramp boshchiligidagi ma’muriyat hokimiyat tepasida turgan olti oy davomida prezidentning xatti-harakatlariga qarshi kamida 500 ta yoki kuniga deyarli to‘rtta da’voga duch kelgan.
Nashr ma’lumotlariga ko‘ra, holatlarning to‘rtdan uch qismida sudyalar Amerika rahbarining nuqtai nazariga qarshi qarorlar chiqargan.
“Ularning katta qismi chet ellik talabalarning immigratsiya va jinoiy o‘tmishiga taalluqli hujjatlardagi qoidabuzarliklar bilan bog‘liq ishlarni ko‘rib chiqishga oid edi”, deyiladi maqolada.
Ta’kidlanishicha, sudlar so‘nggi olti oy ichida “misli ko‘rilmagan miqdordagi ishlarni”, jumladan, “beqiyos immigratsiya janjallarini va federal xizmatchilarni ishdan bo‘shatish yoki davlat muassasalarini qayta tashkil etishda prezident vakolatlari chegaralari bo‘yicha yangicha masalalarni” ko‘rib chiqqan.
“Bu, shubhasiz, Tramp harakatlarining tasavvurga sig‘maydigan ko‘lami va sur’atining aksidir va uning dadil dasturi sudyalarni chalg‘itadigan yangi yuridik dalillar bilan mustahkamlangan”, deyiladi nashrda.
Virjiniya shtatining sobiq bosh prokurori Ken Kuchchinellining so‘zlariga ko‘ra, sudyalarga “Donald Trampning noan’anaviy yondashuvi mutlaqo yoqmaydi”.
Qayd etilishicha, faqat Tramp tomonidan tayinlangan sudyalargina uning foydasiga hukm chiqarishgan.
Izoh (0)