Rossiyada “Vatandosh” o‘zbek jamiyati rahbariga qarshi jinoiy ish ochildi

Moskvada “Vatandosh” o‘zbeklar jamiyati rahbari Usmon Baratovga nisbatan jinoiy ish qo‘zg‘atildi. Bu haqda Tergov qo‘mitasi xabar berdi.

Tergov qo‘mitasiga ko‘ra, dekabr oyida Baratov va boshqa shaxslar Moskva viloyatida bo‘lganlarida ijtimoiy tarmoqdagi shaxsiy sahifalarida “bir guruh ruslar, jumladan, ‘maxsus harbiy operatsiya ishtirokchilari’ning qadr-qimmatini kamsituvchi” postni eʼlon qilgan.

Baratovga nisbatan Jinoyat kodeksining 282-moddasi 2-qismi “v” bandi (uyushgan guruh tomonidan nafrat yoki adovat qo‘zg‘atishga, shuningdek, shaxs yoki guruh qadr-qimmatini kamsitishga qaratilgan harakatlar) bilan jinoiy ish ochilgan.

Tegishli ish doirasida Baratov 600 ming rublgacha jarima, 3 yilgacha muayyan lavozimlarni egallash yoki muayyan faoliyat bilan shug‘ullanish huquqidan mahrum qilingan holda 5 yilgacha majburiy mehnat yoki 3 yildan 6 yilgacha ozodlikdan mahrum qilinishi mumkin.

O‘zbek jamiyati rahbari poytaxt Tergov qo‘mitasi bo‘limiga olib ketilgan. Boshqa aloqadorlar ham aniqlanmoqda, deydi Tergov qo‘mitasi.

Baratovga nisbatan ish ochishni Tergov qo‘mitasi rahbari Aleksandr Bastrikin buyurgan. “Rossiya harbiy muxbirlari” unga o‘zbek jamiyati rahbarining “tahqirlovchi bayonotlari”ga javob berishni so‘rab murojaat qilishgan, deyiladi idora xabarida.

Ish qo‘zg‘atilishiga Baratovning ijtimoiy tarmoqlarda tuxum narxi haqidagi posti sabab bo‘lgan. Tegishli postda tovuqning surati aks etgan, unda shunday yozuv bor “Sizga tuxum emas, yog‘liqqina bir balo bo‘lsin! Xo‘rozlarni frontdan qaytaring!”.

Baratovning o‘zi bir oy davomida uning yordamchisi “tovuqlarning satirik fotosuratini” olib tashlamaganidan afsusda ekanini aytgan. U tegishli post “maxsus harbiy operatsiya ishtirokchilarini” haqorat qilishni bildirmasligini ta’kidlagan.

Uning ma‘lum qilishicha,  tovuqlar va xo‘rozlar “foydali va juda yaxshi parrandalar bo‘lib, ularning maxsus harbiy operatsiyaga hech qanday aloqasi yo‘q” va frontlar “har xil bo‘lishi mumkin, masalan, mehnat”. Ma’lumot o‘rnida, Usmon Baratovning asl millati o‘zbek va Rossiya fuqarosi hisoblanadi.