Joriy yil iyun holatiga ko‘ra, O‘zbekistonda 105 ta tovar va xizmatlar narxi 10 foizdan ziyodga o‘sdi. Bu haqdagi maʼlumot Markaziy bank taqdim etgan infografikada qayd etilgan.
Tahlilda 2025-yil iyunda mamlakatda yillik inflyatsiya darajasi 8,7 foiz ekani keltirilgan. Narxlari 10 foizdan yuqori o‘sgan tovar va xizmatlar ulushi 21 foizni tashkil etgan.
Oziq-ovqat mahsulotlaridan paxta yog‘ining narxi eng yuqori darajada o‘sgan — 43,5 foiz. Shu bilan birga, kartoshka (36,5 foiz) va karam (37,4 foiz) qiymati nisbatan ko‘proq oshgan.
Qo‘y (32 foiz) va mol (30,5 foiz) go‘shtlari hamda kungaboqar yog‘i (28,9 foiz) ham 20 foizdan ortiq qimmatlashgan.
Nooziq-ovqat mahsulotlaridan metan narxi eng yuqori darajada oshgan. O‘tgan oydagi ko‘rsatkichlarga ko‘ra, mazkur turdagi gaz qariyb 36,2 foizga qimmatlashgan.
O‘z navbatida quyidagi mahsulotlar narxlari ham o‘rtacha inflyatsiyadan yuqori darajada oshgan:
- Vitaminlar — 12,5 foiz;
- Antibiotiklar — 11,8 foiz;
- Antigistamin preparatlar — 11,8 foiz;
- Propan — 11,3 foiz;
- Atir sovun — 10,3 foiz.
Markaziy bank qolgan, narxi 10 foizda yuqori o‘sgan 93 ta tovar va xizmat haqida axborot bermagan. Xususan, oxirgi 18 oyda xizmatlar eng yuqori darajada o‘sayotganiga qaramay, tahlilda 10 foizdan ko‘pga qimmatlagan bironta xizmat nomi keltirilmagan.
Joriy yil iyunda aholining kelgusi 12 oylik tovarlar va xizmatlar narxlari ko‘tarilishi bilan bog‘liq kutilmalari 13,2 foizga teng bo‘lgandi. Markaziy bank so‘rovida 50 foizi qatnashchi kommunal to‘lovlar sezilarli oshishini kutayotgani oydinlashgan. Yana 45 foiz respondent yoqilg‘i va energiya qimmatlashishini kutayotganini bildirgan.
Izoh (0)