2024-yilda O‘zbekistonda tijorat banklari tomonidan iqtisodiyotga jami ajratilgan kreditlar ulushi 14,3 foizga o‘sdi. Bu haqda Markaziy bank raisi Timur Ishmetov jurnalistlar bilan muloqotda maʼlum qildi, deya xabar berdi “Daryo” muxbiri.
Timur Ishmetovning aytishicha, o‘tgan yilda mamlakatda milliy valyutadagi kredit qoldig‘i 19 foizga oshgan.
“2024-yilda iqtisodiyotga ajratilgan jami kreditlar 2023-yildagiga nisbatan 14,3 foizga oshib, 287 trillion so‘mni tashkil etdi. Buning natijasida umumiy kredit qo‘yilmalar qoldig‘i 566 trillion so‘mga yetdi. Yil davomida milliy valyutadagi kreditlar qoldig‘i 19 foizga oshdi. Transchegaraviy pul o‘kazmalari kanali orqali mamlakatga 14,8 mlrd dollarlik mablag‘lar kirib keldi (2023-yildagidan 30 foizga ko‘p). Ish haqi va transchegaraviy pul o‘tkazmalari hajmining o‘sishi aholi real daromadlarining 8,1 foizga oshishiga xizmat qildi. Joriy yilda ham pul o‘tkazmalari o‘sib borishi va aholi daromadlari oshishiga ijobiy hissa qo‘shishi kutilmoqda. 2023-yilda aholining banklardagi jami depozitlari 79 trillion so‘m edi. Bu miqdor 2024-yilda 113,5 trillion so‘mgacha oshdi (o‘sish 43 foiz). Bank depozitlari hajmining yuqori o‘sishi joriy yilda ham saqlanib qolishi kutilmoqda. 2025-yil yakuni bo‘yicha mamlakatda iqtisodiy o‘sish 6 foiz bo‘lishi prognoz qilingan”, dedi Markaziy bank raisi.
Avvalroq Timur Ishmetov 2024-yil yakunida inflyatsiya darajasi nega kutilmalardan baland shakllanganiga izoh bergandi. Qayd etilishicha, o‘tgan yili inflyatsiya 9,8 foiz shakllanishiga energiya va ayrim oziq-ovqat mahsulotlari qimmatlashgani taʼsir qilgan.
Izoh (0)