2024 йилда Ўзбекистонда тижорат банклари томонидан иқтисодиётга жами ажратилган кредитлар улуши 14,3 фоизга ўсди. Бу ҳақда Марказий банк раиси Тимур Ишметов журналистлар билан мулоқотда маълум қилди, дея хабар берди “Дарё” мухбири.
Тимур Ишметовнинг айтишича, ўтган йилда мамлакатда миллий валютадаги кредит қолдиғи 19 фоизга ошган.
“2024 йилда иқтисодиётга ажратилган жами кредитлар 2023 йилдагига нисбатан 14,3 фоизга ошиб, 287 триллион сўмни ташкил этди. Бунинг натижасида умумий кредит қўйилмалар қолдиғи 566 триллион сўмга етди. Йил давомида миллий валютадаги кредитлар қолдиғи 19 фоизга ошди. Трансчегаравий пул ўказмалари канали орқали мамлакатга 14,8 млрд долларлик маблағлар кириб келди (2023 йилдагидан 30 фоизга кўп). Иш ҳақи ва трансчегаравий пул ўтказмалари ҳажмининг ўсиши аҳоли реал даромадларининг 8,1 фоизга ошишига хизмат қилди. Жорий йилда ҳам пул ўтказмалари ўсиб бориши ва аҳоли даромадлари ошишига ижобий ҳисса қўшиши кутилмоқда. 2023 йилда аҳолининг банклардаги жами депозитлари 79 триллион сўм эди. Бу миқдор 2024 йилда 113,5 триллион сўмгача ошди (ўсиш 43 фоиз). Банк депозитлари ҳажмининг юқори ўсиши жорий йилда ҳам сақланиб қолиши кутилмоқда. 2025 йил якуни бўйича мамлакатда иқтисодий ўсиш 6 фоиз бўлиши прогноз қилинган”, деди Марказий банк раиси.
Аввалроқ Тимур Ишметов 2024 йил якунида инфляция даражаси нега кутилмалардан баланд шаклланганига изоҳ берганди. Қайд этилишича, ўтган йили инфляция 9,8 фоиз шаклланишига энергия ва айрим озиқ-овқат маҳсулотлари қимматлашгани таъсир қилган.
Изоҳ (0)