Toshkent viloyatida 1,9 mlrd so‘mni o‘zlashtirgan bosh hisobchi aniqlandi, deb xabar berdi Bosh prokuratura huzuridagi Iqtisodiy jinoyatlarga qarshi kurashish departamenti.
Maʼlum qilinishicha, fuqaro S.O. “L.A.” va “Z.P.” MCHJlarning bosh hisobchisi lavozimida ishlab kelgan. U korxonalarning elektron raqamli imzo kalitlaridan foydalanib, jami 1,9 mlrd so‘mni o‘zining plastik kartasiga o‘tkazib olgan.
Holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
Pullarni talon-toroj qilish holatlari
Bundan avval Navoiy viloyatida yonilg‘i mahsulotlari sotuvidan tushgan 689,5 mln so‘mni o‘zlashtirgan shaxslar aniqlangandi.
Shuningdek, O‘zbekistonning qator hududlarida kredit pullarini o‘zlashtirganlar ushlangani, Qashqadaryoda kredit mablag‘larini o‘zlashtirgan bank boshqaruvchisi sobiq o‘rinbosari aniqlangani, Farg‘onada 19 nafar fuqaro nomiga avtokredit rasmiylashtirib, ajratilgan mablag‘ni o‘zlashtirgan shaxslar aniqlangani to‘g‘risida xabar berilgandi.
Samarqand shahrida tadbirkorning 6,4 mlrd so‘m mablag‘ini qimor o‘yinlariga yutqazgan hisobchi aniqlangandi.
Izoh (0)