“Xalq banki” AJ Surxondaryo viloyati Boysun, Uzun, Muzrabot va Oltinsoy tumanlarida joylashgan bank binolarini ta’mirlash bo‘yicha tenderlar o‘tkazdi. Tenderlarda aka-ukalarga tegishli qurilish kompaniyalari raqobatlashgan. “Daryo” muxbiri lotlar ma’lumotlarini ko‘zdan kechirish jarayonida shu va boshqa shubhali holatlarga duch keldi.
Barcha tenderlarda qatnashgan kompaniyalar
Tenderlarda bank tomonidan Boysun va Muzrabot tumanlari uchun 505 million, Uzun tumani uchun 627 million hamda Oltinsoy tumani uchun 492 million so‘mdan ortiq boshlang‘ich narx taklif qilingan.
Oltinsoy tumaniga tegishli lotga 6 ta, Uzun tumaniga 7 ta, Boysun va Muzrabot tumanlariga tegishli tenderda esa 4 tadan qurilish tashkiloti raqobatlashgan. “Surxon Kelajaktrans”, “Toshkent-Termiz-Qurilish” va “Chinor” mas’uliyati cheklangan jamiyatlari barcha lotlarda ishtirok etgan.
Xarid komissiyasi a’zolarining yakuniy xulosalariga ko‘ra, Muzrabot va Boysun tumanlaridagi binolarni “Chinor” MCHJ ta’mirlaydigan bo‘ldi. “Surxon Kelajaktrans” MCHJ esa zaxira g‘olib. Uzun tumanida “Surxon Kelajaktrans” MCHJ g‘alaba qozongan bo‘lsa, Oltinsoy tumanida “Farrux Erkin o‘g‘li” xususiy korxonasi g‘olib deb topildi. Ikkala tenderda ham “Toshkent-Termiz-Qurilish” zaxira g‘olibi sifatida ko‘rsatilgan.
Xarid komissiyasi raisi tasdiqlagan tanlash taklifining texnik qismini baholash mezonlariga ko‘ra agar tegishli hujjatlar, ya’ni davlat buyurtmachilarida loyihalarni amalga oshirganligi haqidagi shartnomalar, qurilish obyektini ko‘zdan kechirganlik to‘g‘risidagi buyurtmachi tomonidan tasdiqlangan ma’lumotnoma (dalolatnoma va rasm), doimiy ishlovchi xodimlarning hujjatlari va elektron mehnat daftarchalari, bank ma’lumotnomasi taqdim etilmasa, qurilish kompaniyasiga 0 ball qo‘yilishi, baholashdan o‘tmagan ishtirokchilar esa tanlovdan chetlatishi lozim edi.
Ammo “Chinor” va “Toshkent-Termiz-Qurilish” MCHJlari talab qilingan hujjatlarni komissiyaga taqdim etmagan bo‘lsa-da, ularga tegishli baholar qo‘yilgan hamda g‘olib va zaxira g‘olibi deb topilgan.
Aka-ukalar raqobatimi?
Yuqoridagi korxonalarning rahbariyati haqidagi ma’lumotlar ko‘zdan kechirilganda “Toshkent-Termiz-Qurilish” korxonasining ta’sischisi va rahbari Toshboyev Qutlug‘ Eshdavlatovich, unga barcha tenderlarda raqobatchilik qilgan “Chinor”ning ta’sischisi esa Toshboyev Quvonch Eshdavlatovich. Bu ikki shaxs aka-uka.
Ushbu ma’lumotni “Daryo” muxbiri bog‘langan “Chinor” MCHJ rahbari Toshboyev Nurkamol Eshdavlatovich tasdiqladi. Ushbu tadbirkorlik subyektlarining yuridik manzillari ham Termizda, bir-biriga juda yaqin hududda joylashgan.
Ikkita tender bo‘yicha haligacha shartnomalar tuzilmagan
To‘rtala tender ham joriy yilning 22-noyabrdan 29-noyabrga qadar bo‘lgan muddatda o‘tkazilgan. Bayonnomalar 3-dekabr kuni rasmiylashtirilgan. Shartnomalarning ikkitasi “Chinor” MCHJ tomonidan imzolangan. Qolgan ikkitasi bo‘yicha esa oradan bir oy o‘tgan bo‘lsa-da, shartnomalar tuzilmagan. Vaholanki, xizmatlarni ko‘rsatish muddati shartnomalar imzolangandan boshlab 30 ish kuni hisoblanadi.
Avvalroq “Daryo” “Xalq banki” 13–19-dekabr kunlari boshlang‘ich narxi salkam 626 mln so‘mlik qurilish bo‘yicha tender o‘tkazgani, unda komissiya a’zolari g‘olibga yon bosgan bo‘lishi mumkinligi haqida yozgandi.
E’tiborli jihati, ushbu tender g‘olibi “Toshkent-Termiz-Qurilish” mas’uliyati cheklangan jamiyati hisoblanadi.
“Daryo” davlat xaridlari sohasini nazorat qiluvchi Raqobatni rivojlantirish va iste’molchilar huquqlarini himoya qilish qo‘mitasi, Korrupsiyaga qarshi kurashish agentligi, Hisob palatasi va boshqa mas’ul bo‘lgan organlardan ushbu tenderlar natijalariga e’tibor qaratib, noqonuniy holatlar aniqlangan taqdirda tegishli choralar ko‘rishni so‘raydi.
Izoh (0)