“Revizor”ning yozishicha Qishloq xo‘jaligi vazirligi BMTning yordam pulidan qimmatbaho mashina sotib olgan. Unga ko‘ra, BMTning Oziq-ovqat va qishloq xo‘jaligi tashkiloti “O‘zbekistonning qurg‘oqchilikka uchragan ekotizimlarida yaylovlar va o‘rmonlarni barqaror boshqarish” loyihasi doirasida Qishloq xo‘jaligi vazirligiga dastlabki grant mablag‘larini ajratgan.
Qishloq xo‘jaligi vazirligi esa loyihaning samarali topshirilishini ta’minlash hamda loyiha hududlariga muntazam ravishda xizmat safarlarini amalga oshirish maqsadida qariyb 600 mln so‘mlik bir dona KIA Carnival Prestige avtomobilini xarid qilgan.
Mazkur xarid bo‘yicha Qishloq xo‘jaligi vazirining axborot siyosati masalalari bo‘yicha maslahatchisi Dilshodbek Nazirov “Daryo”ga izoh berdi.
“Bularning barchasi qonuniy bo‘lgan, tender savdolariga chiqarilgan. FAO bergan loyihaning texnik shartlarida 60 ming dollar evaziga avtomobil sotib olish ham bor.
FAO mas’ullari bilan bog‘langanimizda jamoatchilik mazkur loyiha yuzasidan aynan nimaga e’tiroz borligini tushunmayotganini aytishdi. Loyiha 5 yilga mo‘ljallangan va bu vaqt oralig‘ida transportdan foydalanish uchun aynan shu summa ko‘rsatilgan”, deydi Dilshodbek Nazirov
Ma’lumot uchun, ayni kunda vazirlikning MIB organida jami 85,3 million so‘m qarzdorligi mavjud. Ushbu qarzdorlik jinoyat natijasida yetkazilgan zarar hisobidan vujudga kelgan.
Izoh (0)