Aksiyadorlik tijorat Xalq banki 13–19-dekabr kunlari boshlang‘ich narxi salkam 626 mln so‘mlik qurilish bo‘yicha tender o‘tkazgan. “Daryo” muxbiri lot ma’lumotlarini ko‘zdan kechirish jarayonida komissiya a’zolari g‘olibga yon bosganini aniqladi.
Platformaga joylangan texnik topshiriq hujjatida Xalq bankining Qumqo‘rg‘on tumani “Yangi shahar” mahallasida joylashgan filiali uchun ijaraga olingan binolarni joriy ta’mirlash belgilangan. Ta’mirlash ishlari shartnoma imzolangandan boshlab 30 ish kunida tugallanishi ko‘rsatilgan. Ushbu xizmat uchun taklif qilingan boshlang‘ich narxi 625 million 499 ming 652 so‘m so‘m etib belgilangan.
Hujjat Xalq banki Surxondaryo viloyat mintaqaviy markazi boshlig‘i Asqar Yuldashev imzolagan. U bir vaqtning o‘zida tender xarid komissiyasi raisi ham hisoblanadi.
Tender joriy yil 13–19-dekabr oralig‘ida o‘tkazilgan. Bayonnoma 23-dekabr kuni rasmiylashtirilgan. Shartnoma esa 27-dekabr kuni imzolangan.
Lotni yutib olish uchun beshta — “Surxon kelajaktrans”, “Turon zamin”, “Diyorbek ideal servis qurilish”, “Toshkent—Termiz qurilish” mas’uliyati cheklangan jamiyatlari hamda “Javohir Asliddin” xususiy korxonasi raqobatlashgan.
Yakuniy natijaga ko‘ra, 92.70968 ball bilan “Toshkent-Termiz-qurilish” MCHJ g‘olib deb topilgan. “Turon zamin” MCHJ esa 92.70949 ball bilan zaxira g‘olib sifatida ko‘rsatib o‘tilgan. Bayonnomaga 5 nafar komissiya a’zolarining barchasi roziligini bildirgan.
Bayonnoma bilan tanishish davomida Ishtirokchining qurilish-pudrat tashkilotlari elektron reytingidagi ko‘rsatkichi mezoni bo‘yicha baholashda xarid komissiyasi a’zolari g‘olibni noto‘g‘ri baholagani aniqlandi.
Baholashda elektron reytingda SSS va undan yuqori ko‘rsatkichi uchun – 3 ball, S yoki SS ko‘rsatkichi uchun – 2 ball, DDD ko‘rsatkichi uchun esa — 1 balldan baholanishi belgilangan.
“Toshkent-Termiz-qurilish” MCHJ reytingda DDD ko‘rsatkichiga ega bo‘lsa-da, baholash jarayonida reyting ko‘rsatkichi ilova qilinishi, 1 ta S ko‘rsatkichga ega ekanligi aytilib, unga 2 ball berilgan. Vaholanki, xarid komissiyasi a’zolari avvalgi tenderlarda ushbu jamiyatning reyting ko‘rsatkichini 1 balldan baholashgan.
Bundan tashqari, amaldagi tartib-qoidalarga ko‘ra, g‘olib ishtirokchi davlat buyurtmachilarida loyihalarni amalga oshirgani haqidagi shartnomalar, qurilish obyektini ko‘zdan kechirganlik to‘g‘risidagi buyurtmachi tomonidan tasdiqlangan ma’lumotnoma (dalolatnoma va rasm), doimiy ishlovchi xodimlarning hujjatlari va elektron mehnat daftarchalari, bank ma’lumotnomasi ilova qilishi shart. Biroq o‘rganishimiz davomida “Toshkent-Termiz-qurilish” MCHJ tomonidan yuqoridagi va boshqa hujjatlar belgilangan muddatlarda taqdim etilmagani aniqlandi.
Shunday bo‘lsa-da, xarid komissiyasi “Toshkent-Termiz-qurilish” mas’uliyati cheklangan jamiyatini tenderdan chetlatish o‘rniga uni sun’iy ravishda yuqori baholab, g‘olib deb topgan. Bu orqali xarid komissiyasi a’zolari qator qo‘pol qonunbuzilishlarga yo‘l qo‘ygan. Buni bayonnoma va mazkur tenderga oid boshqa hujjatlar tasdiqlab turibdi.
Ma’lumot uchun, Aksiyadorlik tijorat Xalq banki 1995-yilda davlat ro‘yxatidan o‘tkazilgan bo‘lib, ulushining 77.60 foizi O‘zbekiston Respublikasi tiklanish va taraqqiyot jamg‘armasiga, 22.40 foizi Moliya vazirligiga tegishli. Ya’ni bank davlat tasarrufidagi muassasa hisoblanadi.
“Daryo” mas’ullardan ushbu shubhali tender natijalariga e’tibor qaratib, noqonuniy holatlar bo‘yicha tegishli chora ko‘rishni so‘raydi.
Izoh (0)