Raqobatni rivojlantirish va iste’molchilar huquqlarini himoya qilish qo‘mitasi Termiz davlat pedagogika institutining 2 mlrd so‘mlik tenderi natijalari bekor qilinganini ma’lum qildi.
Qo‘mitaning Surxondaryo viloyati hududiy boshqarmasiga Termiz davlat pedagogika instituti tomonidan 11-iyulda boshlang‘ich qiymati 2 milliard so‘mlik tender savdosi o‘tkazilgani yuzasidan murojaat kelib tushgan.
Murojaatga asosan olib borilgan o‘rganishda, buyurtmachi (Termiz davlat pedagogika instituti) tomonidan institutining yangi qurilayotgan o‘quv binosiga mebellar xarid qilish uchun boshlang‘ich qiymati 2 002 382 125 so‘mlik tanlov savdosi o‘tkazilgani aniqlandi.
Mazkur tender savdosida, buyurtmachi tashkilot (xarid komissiyasi) tomonidan ishtirokchilar (“Stekloplastik” MCHJ, “Global Tex Prom Servis” MCHJ, “Muhammadali savdo sanoat servis” MCHJ, “Farovon-Fayz” XK, NEATEST MCHJ va “Omad Xamrox Mezon” MCHJ) taqdim etgan tanlov takliflarini baholash mezonlarining nisbiy qiymati ishlab chiqilmagani ma’lum bo‘ldi.
Ishni ko‘rib chiqish natijasida, “Raqobat to‘g‘risida”gi qonunining 29-moddasi talablari buzilishi alomatlari yuzasidan Termiz davlat pedagogika institutiga nisbatan ish qo‘zg‘atilib, ishni ko‘rib chiqish yakuni bo‘yicha qo‘mita ko‘rsatmasi bilan tender savdosi natijalari bekor qilindi.
Izoh (0)