Yevropadagi treyderlar foydalanilmayotgan ko‘mir uchun dunyoning boshqa qismlaridan xaridor qidirmoqda. Bu haqda Bloomberg xabar berdi.
Yirik ko‘mir zaxiralari Yevropada 2022-yilda shakllangan va issiq qish tufayli ularning ko‘p qismi ishlatilmagan. Ember tadqiqot markazi ma’lumotlariga ko‘ra, Yevropa Ittifoqi mamlakatlari o‘tgan qishga qaraganda 11 foiz kamroq ko‘mir yoqqan.
Perret Associates kompaniyasining ko‘mir bozori tahlilchisi Guillaume Perret ko‘mirning bir qismi bir yildan ko‘proq vaqt davomida saqlanishi va uni saqlash juda qimmatga tushishiga e’tibor qaratdi.
Ochiq havoda bir necha oy saqlanganidan so‘ng, ko‘mir parchalana boshlaydi va oxir-oqibat yaroqsiz holga keladi, — deya qayd etadi Bloomberg.
2023-yilda Ispaniya, Niderlandiya va boshqa Yevropa davlatlaridan Marokash, Senegal, Gvatemala va Hindiston kabi bozorlarga 1,12 million tonna ko‘mir jo‘natildi, deb yozadi Bloomberg. Agentlik qayd etishicha, Yevropa mamlakatlarga oxirgi marta aprel oyida 145 ming tonnadan ortiq yuk yetkazib bergan.
Ta’kidlanishicha, Hindiston va Xitoy uchun Yevropadan ko‘mirning chiqib ketishi foydali: jahon ko‘mir iste’molining yarmidan ko‘pi bu mamlakatlar hissasiga to‘g‘ri keladi.
Tahlilchilar Xitoy iqtisodiyotining tiklanishi sekinlashuviga e’tibor qaratgan bo‘lsa-da, Bloomberg ma’lumotlariga ko‘ra, Xitoy 2023-yilda 360-380 million tonna ko‘mir importi bilan rekord darajaga intilmoqda.
2022-yil avgust oyida Yevropa Ittifoqi Ukrainadagi urush tufayli Rossiyadan ko‘mir importini taqiqladi. Shundan so‘ng Rossiya o‘z ta’minotining muhim qismini Osiyoga, birinchi navbatda, Xitoy va Hindistonga yo‘naltirdi.
Arktikani rivojlantirish bo‘yicha komissiya Rossiya ko‘mirini Shimoliy dengiz yo‘li orqali Osiyo mamlakatlariga eksport qilish imkoniyatini ko‘rib chiqdi.
Avvalroq Rossiyadan Osiyoga ko‘mir eksporti narxi oshgani ma’lum qilingani haqida xabar berilgandi.