Ҳиндистон ҳукумати Россиядан Украинага қарши уришаётган фуқароларини муддатидан олдин озод этишни талаб қилди. Бу ҳақда Deccanherald хабар берди.
Тегишли талаб Ҳиндистон фуқаросининг жанг майдонида ҳалок бўлгани фонида эълон қилинди. Гап Керала штатининг Триссур шаҳрида туғилган Бинил Бабу ҳақида бормоқда. Унинг қачон ва қаерда ҳалок бўлгани аниқ эмас. Бироқ унинг ўлими ҳақидаги хабардан сўнг Нью Дели Россия ҳукуматидан барча ҳиндларни тезроқ ватанига қайтаришни талаб қилган.
Ҳозирда Ҳиндистоннинг Москвадаги элчихонаси Бабунинг жасадини унинг она шаҳрига етказиб бериш масаласини ҳал қилмоқда.
“Биз марҳумнинг оиласига чуқур таъзиямизни билдирамиз. Москвадаги элчихонамиз жабрланганларнинг оилалари билан алоқада бўлиб, мумкин бўлган барча ёрдамни кўрсатмоқда. Марҳумнинг жасадини Ҳиндистонга тезроқ етказиб бериш учун Россия ҳукумати билан ҳамкорлик қилмоқдамиз. Қолган ҳинд фуқароларини тезроқ озод қилиш ҳақидаги талабимизни ҳам такрорладик”, деди Ҳиндистон Ташқи ишлар вазирлиги вакили Рандҳир Жайсвал.
Ҳиндистон ҳукумати, шунингдек, Москвадан Украинадаги жангларда яраланган, Россия армияси билан шартнома тузган Жайн Куриэнни иложи борича тезроқ ватанига қайтаришни талаб қилмоқда.
Ҳиндистон фуқаролари Россия армияси сафида
2024 йил 13 декабрда Россия қўшинларида Ҳиндистоннинг 19 нафар фуқароси қолгани маълум бўлганди. Ҳиндистон ҳукумати Россиядан армиядаги ҳиндистонликлар жойлашуви ҳақида янгиланган маълумот беришни, шунингдек, уларнинг хавфсизлигини таъминлаш ва тезроқ ҳарбий хизматдан бўшатишни сўраб мурожаат қилган.
Август ойида ташқи ишлар вазири Субраманям Жайшанкар 91 нафар ҳиндистонлик Россия армиясига чақирилгани ва улардан саккиз нафари ҳалок бўлганини айтган.
Сентябрь ойида 45 нафар ҳиндистонлик Россия армиясидан бўшатилгач, 50 нафари Украинага қарши жанг қилишни давом эттирган. Улар ноқонуний равишда Россия армиясига қўшилишга мажбурлангани ва фронтга жўнатилгани айтмоқда.
Июль ойида Ҳиндистон бош вазири Нарендра Моди Москвага ташрифи ва Россия президенти Владимир Путин билан учрашуви чоғида ҳиндларни ҳарбий хизматдан бўшатиш ва янги ёллашларга йўл қўймаслик масалаларини кўтарганди.
Путин ҳар икки масалани ҳал қилишга кўмаклашишини айтган. Кўп ўтмай, бир нечта ҳинд оилалари Украинадаги урушда ҳалок бўлган қариндошлари учун “Россиядан товон пули” ола бошлаганини билдирган. Гап ўн минглаб доллар миқдоридаги маблағ ҳақида кетмоқда.
Март ойи бошида Ҳиндистон Марказий тергов бюроси (CBI) бир ой ичида 35 га яқин ҳинд фуқароси алдов йўли билан Россия армиясига ёлланганини хабар қилди. Жами уларнинг сони юздан ортиқ бўлиши мумкин. Икки киши ҳалок бўлган, яна бир нечаси оғир яраланган.
Май ойида Ҳиндистонда маҳаллий аҳолини Украинадаги урушга юбориш учун ёллаш билан шуғулланган олти кишидан иборат тармоқ фош этилди. Улар ижтимоий тармоқлар ва бир нечта штатлардаги маҳаллий ёлловчилар орқали иш олиб борган. Жиноятчилар ҳиндларга Россияда қўриқчи бўлиб ишлашни ваъда қилган. Кўпинча шартномага қишлоқ жойларидан келиб чиққан, маълумоти паст ва ҳужжатларни имзолашда алданган ёшлар жалб қилинган.
Изоҳ (0)