Ukrainadan 2021-yildan beri evakuatsiya qilingan yuzlab hindistonlik MBBS talabalari O‘zbekistondagi yetakchi tibbiyot universitetida o‘qishlarini davom ettirmoqda. Bu haqda Times of India xabar berdi.
Qayd etilishicha, Hindistonning Ukrainadagi elchixonasi talabalar boshqa joyga ko‘chib o‘tishlari mumkin yoki yo‘qligini so‘rab murojaat qilganidan so‘ng, Samarqand davlat tibbiyot universiteti 1000 dan ortiq hindistonlik tibbiyot talabalarini qabul qilgan.
Bihar shtatining Begusaray shahridan bo‘lgan Amit ismli talaba Rossiya hujum qilgan vaqtda Ukrainada o‘qiyotgan bo‘lgan va u bir tunni yerto‘lada o‘tkazgan. Keyinroq esa u Hindiston hukumati tomonidan “Ganga operatsiyasi” tashabbusi doirasida evakuatsiya qilingan.
“Men o‘lib yoki Ukrainada qolib ketaman deb o‘yladim. Hindistonga qaytganimdan so‘ng men va oilam yengil tortdi, lekin keyin nima bo‘lishi haqida hech qachon tugamaydigan noaniqlik davri boshlandi. Men Ukrainada uch yillik MBBS kursini tugatgan edim va hammasini boshidan boshlash yoki boshqa sohadan ketish variant menga to‘g‘ri kelmas edi. Keyinroq O‘zbekistonga ko‘chib o‘tishga qaror qildim”, — deydi Amit.
Uning aytishicha, Samarqandda yashash narxi Ukrainanikidan qimmatroq, lekin u o‘qishni davom ettirish imkoniyatidan xursand.
Samarqand davlat tibbiyot universiteti prorektori, doktor Zafar Aminovning so‘zlariga ko‘ra, urush boshlanganda Hindiston elchixonasi ularga murojaat qilib, jabrlangan talabalar boshqa joyga ko‘chib o‘tishga ruxsat olishlari mumkinligi haqida so‘ragan.
“Biz ushbu talabalarni baholadik va oxir-oqibat ularni bir semestr qayta o‘qitishga qaror qildik. Keyin biz transferlarni osonlashtirish uchun jamoa tuzdik va bu talabalar uchun maxsus tadbirlarni amalga oshirdik. Shuningdek, muloqot jarayonida muammolar bo‘lmasligi uchun yana 30 nafar hindistonlik o‘qituvchini yolladik”, — deydi u.
Aminovning aytishicha, universitet Ukrainadan kelgan 1000 dan ortiq hindistonlik talabani qabul qilgan.
Izoh (0)