Xitoy boshqa mamlakatlarning rivojlanishini bostirishga va chegaralashga qaratilgan ikkiyuzlamachi siyosat olib borayotgan AQSHning amaldagi prezidenti Jo Bayden ma’muriyati harakatlariga javoban choralar ko‘radi. Bu haqda Xitoy Savdo vazirligi ma’lum qildi.
“Bayden hukumati o‘z vakolatlarining qolgan muddatidan foydalanib, Xitoyga nisbatan savdo cheklovlarini jadal joriy etmoqda”, deyiladi vazirlik bayonotida.
Vazirlikning ta’kidlashicha, ular sanksiyalar, cheklash va bostirishga tayanib, bir narsani aytib, amalda esa boshqa narsani ko‘rsatmoqda.
“Bu XXR taraqqiyotini to‘xtata olmaydi, aksincha uning o‘z-o‘zini takomillashtirish jarayonini tezlashtiradi, ilmiy-texnik innovatsiyalar sohasidagi ishonchini va qobiliyatini yanada mustahkamlaydi”, deya qo‘shimcha qilgan vazirlik.
Xabarda qayd etilishicha, Oq uy milliy xavfsizlikni himoya qilish bahonasida Xitoyga bosim o‘tkazishga urinmoqda. Buning uchun yarim o‘tkazgichlar ishlab chiqarish bilan bog‘liq eksport ustidan nazoratni kuchaytirmoqda, shuningdek, Xitoyning internetga ulanadigan dasturiy ta’minoti, uskunalari va transport vositalaridan foydalanishni cheklovchi qoidalarni joriy etmoqda.
Qo‘shma Shtatlar, shu bilan birga, dronlar, axborot-kommunikatsiya texnologiyalari va xizmatlari bo‘yicha tekshiruvlar boshlab yubordi. Bundan tashqari, Amerika tomoni bir qator Xitoy kompaniyalariga qarshi sanksiyalar qo‘llab, ularni obro‘siz bozorlar ro‘yxatiga kiritdi.
“Xitoy ushbu choralardan qat’iy norozi. Bayden ma’muriyatining bu harakatlari Xitoy korxonalarining qonuniy huquq va manfaatlarini jiddiy ravishda kamsitmoqda, bozor qoidalari va xalqaro savdo-iqtisodiy tartibni buzmoqda”, deyiladi Savdo vazirligi xabarida.
Vazirlikning qayd etishicha, bu nafaqat Xitoy-AQSH savdo-iqtisodiy munosabatlariga zarar yetkazadi, balki jahon iqtisodiyotining barqaror rivojlanishiga jiddiy ta’sir ko‘rsatadi.
“Xitoy tegishli choralar ko‘radi va o‘z suvereniteti, xavfsizligi hamda taraqqiyot manfaatlarini qat’iy himoya qiladi”, deya xulosa qilgan idora.
Bir kun avval AQSH Milliy xavfsizlik vazirligi (DHS) Xitoyning 37 ta kompaniyasini uyg‘urlarning majburiy mehnatidan foydalanadigan korxonalar ro‘yxatiga kiritilganini e’lon qildi. Xitoyning eng yirik to‘qimachilik ishlab chiqaruvchilaridan biri — Huafu Fashion hamda uning 25 ta bo‘linmasi ushbu qora ro‘yxatga kiritildi. Quyosh panellarining yirik ishlab chiqaruvchilari, jumladan Donghai JA Solar va Jiangsu Meike Solar ham ro‘yxatdan joy olgan.
Izoh (0)