Grenlandiya yetakchisi Mute Egede AQSHning saylangan prezidenti Donald Tramp bilan orolning kelajagi bo‘yicha muloqot qilishga tayyorligini aytdi. Bu haqda The New York Post xabar berdi.

Egede orol AQSHga sotilmasligini ta’kidladi. Biroq Grenlandiya “amerikaliklar o‘z dunyosining bir qismi deb hisoblaydigan joy” ekanini aytdi. U hali Tramp bilan gaplashmagan bo‘lsa-da, “tomonlarni nima birlashtirayotgani haqidagi munozaralar” uchun ochiqligini ta’kidladi.

“Biz muloqotga tayyormiz. Hamkorlik — bu dialog. Hamkorlik yechimlar ustida ishlashni anglatadi”, deya ta’kidladi u.

Grenlandiya 18-asrdan beri Daniyaning mustamlakasi bo‘lgan va 1953-yilda Daniyaning o‘zini o‘zi boshqaradigan hududiga aylangan. 2009-yilda orol aholisi ovoz bergan taqdirda mustaqillikka erishish huquqini qo‘lga kiritgan.

“Bizda mustaqillikka intilish, o‘z uyimizda xo‘jayin bo‘lish istagi bor... Buni hamma hurmat qilishi kerak. Grenlandiya — grenlandiyaliklarniki. Na daniyalik, na amerikalik bo‘lishni istaymiz. Biz grenlandiyalik bo‘lishni xohlaymiz”, deya ta’kidladi Egede.

Tramp Grenlandiyani o‘zlashtirmoqchi

AQSHning saylangan prezidenti bir necha bor Grenlandiya AQSH tarkibiga kirishi kerakligini aytgandi. Un orol milliy xavfsizlik va himoya uchun, jumladan, Xitoy va Rossiyadan himoyalanishda strategik ahamiyatga egaligini aytgan. Grenlandiya bosh vaziri Muke Egede bunga javoban orol “hech qachon sotilmaydi” deb javob bergan. Shu bilan birga, u orol Daniyadan mustaqillikka erishmoqchi ekanini tan olgan.

Bloomberg manbalariga ko‘ra, Tramp jamoasi Grenlandiya bilan qiziqishgan, chunki orolda elektron qurilmalarda ishlatiladigan oltin, olmos, uran va nodir metallarning katta zaxiralari mavjud. AQSHning Grenlandiya mineral-xomashyo sektoriga kiritgan sarmoyasi dunyoning nodir metallar bozorida Xitoyning hukmronligiga qarshi kurashda hal qiluvchi rol o‘ynashi mumkin.

Trampning tahdidlari tufayli Daniya Grenlandiya mudofaasini kuchaytirib, gerbini o‘zgartirgan. Qirol Frederik X Norvegiya va Shvetsiya bilan ittifoqqa ishora qilgan va 500 yildan ortiq vaqt davomida gerbda bo‘lgan uchta tojni olib tashlashni buyurgan. Grenlandiya va Farer orollari ramzlari — oq ayiq va qo‘chqor ikki qismga bo‘linib, ikkinchi va uchinchi maydonlarga ko‘chirilgan, ya’ni kattalashtirilgan. Daniya va Janubiy Yutlandiya ramzlari esa birinchi va to‘rtinchi maydonlarga o‘tkazildi.