Isroil va Falastinning HAMAS tashkiloti o‘rtasida o‘t ochishni to‘xtatish va garovga olinganlarni ozod qilish to‘g‘risidagi bitim bo‘yicha bilvosita muzokaralar yakuniy bosqichda, asosiy to‘siqlar bartaraf etilgan. Bu haqda muzokaralarda vositachi vazifasini bajaruvchi Qatar TIV xabar qildi.
Isroil, Falastin va arab manbalarining OAVga ma’lum qilishicha, kelishuv bugun,14-yanvar kuni imzolanishi mumkin.
“So‘nggi kunlarda tomonlar G‘azoda yarashish bitimiga erishishga to‘sqinlik qilayotgan asosiy to‘siqlarni yengib o‘tishga muvaffaq bo‘lishdi. Biz kelishuvga erishishning yakuniy bosqichiga yaqinlashdik”, dedi Qatar TIV vakili Majid bin Muhammad al-Ansari.
Arab va Isroil rasmiylarining anonimlik sharti bilan The Wall Street Journal’ga ma’lum qilishicha, tomonlar asosiy bandlar bo‘yicha kelishib olgan, ammo ba’zi ta’riflarni muhokama qilishda davom etmoqda.
Shartnomaning yakuniy loyihasi allaqachon HAMAS tomonidan qabul qilingan, Isroil hukumati tomonidan tasdiqlanishi kutilmoqda, deb xabar berdi Associated Press manbalari.
AP va Reuters’ning yozishicha, bitimning uchta bosqichidan birinchisi olti hafta davom etadi, bu vaqt ichida HAMAS 33 nafar isroillik garovga olinganlarni, xususan, ayollar, bolalar, keksalar va yaradorlarni Isroildagi 1000 nafar mahbus falastinlik ayollar va bolalar evaziga ozod qilishi kerak. Shu bilan birga, Isroil qo‘shinlari G‘azo sektori aholi punktlarini tark eta boshlaydi.
Ikkinchi bosqichda jangarilar Isroil armiyasini anklavdan to‘liq olib chiqish evaziga qolgan asirlarni ozod qiladilar, uchinchi bosqichda esa HAMAS halok bo‘lgan garovdagilarning jasadlarini qaytaradi va tomonlar G‘azo sektorini qayta qurish bo‘yicha besh yillik rejani kelishib oladilar.
Isroilning Ynet nashri hukumat HAMAS yetakchisi Yahyo Sinvarning jasadini G‘azoda o‘t ochishni to‘xtatish va garovga olinganlarni ozod qilish bo‘yicha kelishuv doirasida qaytarishni rejalashtirmayotgani haqida yozgandi.
Avvalroq Al Arabiya telekanali Falastin tomoni kelishuvning birinchi bosqichi doirasida Sinvarning jasadini topshirishni talab qilayotgani haqida ma’lumot tarqatgandi.
Yahyo Sinvar 2017-yildan buyon G‘azo sektorida HAMASni boshqargan. U guruhning Isroil G‘azoga bostirib kirishiga mudofaaviy javobini boshqargan va o‘t ochishni to‘xtatish bo‘yicha muzokaralarda qatnashgan. Sinvar 2024-yilning iyul oyida HAMAS siyosiy yetakchisi Ismoil Haniya va G‘azoda yuqori darajali qo‘mondon Muhammad Deif o‘ldirilganidan so‘ng HAMASga rahbarlik qildi. U 2024-yil 16-oktyabr kuni Isroil operatsiyasi oqibatida vafot etdi.
Isroil Sinvarni 2023-yil 7-oktyabrda 1139 kishining o‘limi va 250 ga yaqin kishi garovga olingan HAMAS operatsiyasini rejalashtirganlikda ayblaydi. Isroilning G‘azo sektoridagi harbiy amaliyotlari oqibatida 46 mingdan ortiq kishi halok bo‘ldi va infratuzilma keng miqyosda vayron bo‘ldi.
Izoh (0)