Damashq xalqaro aeroporti 7-yanvar kuni xalqaro reyslar uchun ochiladi. Bu haqda Suriya fuqaro aviatsiyasi va havo transporti qo‘mitasi rahbari Eshxed Solibiy xabar berdi.
Solibiyning ta’kidlashicha, ayni paytda Halab va Damashq aeroportlarida operatsiyalarni qayta tiklash bo‘yicha tayyorgarlik ishlari davom etmoqda.
“Biz hamkorlarimiz yordamida ushbu aeroportlar butun dunyodan reyslarni qabul qila olishini ta’minlayapmiz”, deya qo‘shimcha qildi u.
Faoliyat tiklangandan so‘ng, 18-dekabr kuni Damashq aeroportidan uchgan birinchi yo‘lovchi reysi Halab aeroportiga qo‘ngandi. 8-dekabr kuni prezident Bashar Asad ag‘darilganidan keyin tijoriy parvozlar vaqtincha to‘xtatilgandi. Qatar Airways Damashqqa parvozlarni tiklamoqda.
Suriyaga allaqachon xalqaro yordam va xorijiy diplomatik delegatsiyalar bilan samolyotlar qo‘na boshladi. Syrian Airlines aviakompaniyasi 7-yanvardan boshlab Damashqdan Dubayga parvozlarni amalga oshiradi.
Qatar Airways aviakompaniyasi deyarli 13 yillik tanaffusdan so‘ng Suriya poytaxtiga parvozlarni qayta tiklaganini e’lon qildi. 7-yanvardan boshlab haftasiga uchta reys rejalashtirilgan.
Doha Suriyaning yangi hukumatiga Damashqdagi aeroportning normal ishlashini ta’minlashda yordam taklif qilgan.
Izoh (0)