Исроил ва Фаластиннинг ҲАМАС ташкилоти ўртасида ўт очишни тўхтатиш ва гаровга олинганларни озод қилиш тўғрисидаги битим бўйича билвосита музокаралар якуний босқичда, асосий тўсиқлар бартараф этилган. Бу ҳақда музокараларда воситачи вазифасини бажарувчи Қатар ТИВ хабар қилди.
Исроил, Фаластин ва араб манбаларининг ОАВга маълум қилишича, келишув бугун,14 январь куни имзоланиши мумкин.
“Сўнгги кунларда томонлар Ғазода ярашиш битимига эришишга тўсқинлик қилаётган асосий тўсиқларни енгиб ўтишга муваффақ бўлишди. Биз келишувга эришишнинг якуний босқичига яқинлашдик”, деди Қатар ТИВ вакили Мажид бин Муҳаммад ал-Ансари.
Араб ва Исроил расмийларининг анонимлик шарти билан The Wall Street Journal’га маълум қилишича, томонлар асосий бандлар бўйича келишиб олган, аммо баъзи таърифларни муҳокама қилишда давом этмоқда.
Шартноманинг якуний лойиҳаси аллақачон ҲАМАС томонидан қабул қилинган, Исроил ҳукумати томонидан тасдиқланиши кутилмоқда, деб хабар берди Associated Press манбалари.
AP ва Reuters’нинг ёзишича, битимнинг учта босқичидан биринчиси олти ҳафта давом этади, бу вақт ичида ҲАМАС 33 нафар исроиллик гаровга олинганларни, хусусан, аёллар, болалар, кексалар ва ярадорларни Исроилдаги 1000 нафар маҳбус фаластинлик аёллар ва болалар эвазига озод қилиши керак. Шу билан бирга, Исроил қўшинлари Ғазо сектори аҳоли пунктларини тарк эта бошлайди.
Иккинчи босқичда жангарилар Исроил армиясини анклавдан тўлиқ олиб чиқиш эвазига қолган асирларни озод қиладилар, учинчи босқичда эса ҲАМАС ҳалок бўлган гаровдагиларнинг жасадларини қайтаради ва томонлар Ғазо секторини қайта қуриш бўйича беш йиллик режани келишиб оладилар.
Исроилнинг Ynet нашри ҳукумат ҲАМАС етакчиси Яҳё Синварнинг жасадини Ғазода ўт очишни тўхтатиш ва гаровга олинганларни озод қилиш бўйича келишув доирасида қайтаришни режалаштирмаётгани ҳақида ёзганди.
Аввалроқ Al Arabiya телеканали Фаластин томони келишувнинг биринчи босқичи доирасида Синварнинг жасадини топширишни талаб қилаётгани ҳақида маълумот тарқатганди.
Яҳё Синвар 2017 йилдан буён Ғазо секторида ҲАМАСни бошқарган. У гуруҳнинг Исроил Ғазога бостириб киришига мудофаавий жавобини бошқарган ва ўт очишни тўхтатиш бўйича музокараларда қатнашган. Синвар 2024 йилнинг июль ойида ҲАМАС сиёсий етакчиси Исмоил Ҳания ва Ғазода юқори даражали қўмондон Муҳаммад Деиф ўлдирилганидан сўнг ҲАМАСга раҳбарлик қилди. У 2024 йил 16 октябрь куни Исроил операцияси оқибатида вафот этди.
Исроил Синварни 2023 йил 7 октябрда 1139 кишининг ўлими ва 250 га яқин киши гаровга олинган ҲАМАС операциясини режалаштирганликда айблайди. Исроилнинг Ғазо секторидаги ҳарбий амалиётлари оқибатида 46 мингдан ортиқ киши ҳалок бўлди ва инфратузилма кенг миқёсда вайрон бўлди.
Изоҳ (0)