Isroil va Livanning “Hizbulloh” harakati o‘rtasida o‘t ochishni to‘xtatish rejimi kuchga kirdi. Shundan so‘ng HAMAS ham G‘azodagi urushni to‘xtatish bo‘yicha kelishuvga tayyorligini aytdi. Bu haqda harakatning ismini oshkor etmagan vakili AFP’ga ma’lum qildi.
Biz Misr, Qatar va Turkiyadagi vositachilarga HAMAS o‘t ochishni to‘xtatish va asirlarni almashish bo‘yicha jiddiy kelishuvga tayyorligini ma’lum qildik, dedi u.
Shu bilan birga, harakat vakili Isroilni kelishuvga to‘sqinlik qilishda aybladi. AQSH va Isroil rasmiylari Livanda o‘t ochishni to‘xtatish bitimi ortidan “Hizbulloh”ning harbiy yordamini yo‘qotish HAMASni sulhga undashiga ishonmoqda.
Isroil va “Hizbulloh” o‘rtasidagi sulh
Isroil Vazirlar mahkamasi 26-noyabr kuni Livanda o‘t ochishni to‘xtatish to‘g‘risidagi bitimni ma’qulladi. Otashkesim 27-noyabr kuni mahalliy vaqt bilan soat 4:00 dan (Toshkent vaqti bilan soat 7:00 dan) kuchga kirgan. Ungacha tomonlar o‘zaro hujumlarni amalga oshirgan.
AQSH prezidenti Jo Bayden o‘t ochishni to‘xtatishga Vashington tashabbusi bilan erishilganini aytdi. “Hizbulloh” 60 kun ichida Livandagi harbiylarini olib chiqib ketishi kerak. Binyamin Netanyaxuga ko‘ra, sulhning davomiyligi “Hizbulloh” harakatlariga bog‘liq bo‘ladi.
“Hizbulloh” BMT Xavfsizlik kengashining 1701-rezolyutsiyasiga muvofiq Livanning janubidagi ishtirokini to‘xtatib, Litani daryosining shimolidan chekinishi kerak. BMT muvaqqat kuchlari ko‘magida Livan armiyasining janubiy chegara bo‘ylab uchastkalarni bosqichma-bosqich nazorat qilishni nazarda tutadi.
Izoh (0)