AQSH prezidentligidan iste’foga chiqayotgan Jo Bayden 15-yanvar kuni millatga xayrlashuv nutqini so‘zlaydi.
Matbuot xabarida tafsilotlar keltirilmagan, biroq xayrlashuv nutqi lavozimni tark etayotgan AQSH prezidentlari uchun an’ana hisoblanadi. Masalan, noyabr oyidagi prezidentlik saylovlarida Oq uy rahbari etib saylangan Donald Tramp o‘zining birinchi prezidentligining so‘ngida xayrlashuv nutqining katta qismini o‘z ma’muriyati siyosatidagi yutuqlar deb hisoblagan narsalarga bag‘ishlagan edi.
Xususan, Tramp “birorta ham urush boshlamaganini” ta’kidlagan, shu bilan birga Xitoyga “ilgari hech qachon bo‘lmaganidek” qarshi turgani va “AQSHning boshqa davlatlar bilan ittifoqlarini tiklagan”ini aytdi.
Jo Bayden 10-yanvar kuni AQSH prezidenti sifatidagi so‘nggi muzokaralardan birini Ukraina prezidenti Vladimir Zelenskiy bilan o‘tkazdi. Zelenskiyning so‘zlariga ko‘ra, Bayden yana bir bor “Ukraina mustaqilligini saqlash va himoya qilish butun Yevropa va demokratik dunyo uchun hal qiluvchi ahamiyatga ega”ligini ta’kidladi. Uning millatga qilajak xayrlashuv murojaatida ham shu mavzuga to‘xtalib o‘tilishini kutish mumkin.
Avvalroq Jo Bayden AQSH yetakchisi sifatida Yevropa Ittifoqiga so‘ngi tashrifini bekor qilgandi — uning Italiyaga tashrifi 9-12 yanvarga mo‘ljallangan. Bunga Kaliforniyada davom etayotgan keng ko‘lamli yong‘inlar sabab bo‘ldi. Baydenning o‘zi mahalliy qutqaruvchilar bilan uchrashuvidan so‘ng bu yong‘inlarni mintaqa tarixidagi eng dahshatli voqea deb atadi.
Izoh (0)