Ukrainaga qarshi urushga jalb qilingan shimoliy koreyalik askarlarning 3 mingdan ortig‘i halok bo‘ldi va yaralandi. KXDR hukumati asirlikka tushmaslik uchun askarlaridan o‘zini portlatishni so‘ramoqda. Bu haqda Reuters xabar berdi.
Janubiy Koreya razvedkasiga ko‘ra, KXDR tomonidan 300 ga yaqin askar halok bo‘lgan va 2700 kishi yaralangan. KXDR hukumati o‘z askarlarini asirlikdan qochish uchun o‘zini portlatib, o‘z joniga qasd qilishga chaqirmoqda.
“Asirga olingan askarlar ularni Janubiy Koreyaga ko‘chirish to‘g‘risida hech qanday iltimos bildirmagan. Garchi Seul bunday so‘rovlar kelib tushsa, Kiyev bilan hamkorlik qilishga tayyor, deya xabar bermoqda Yonhap.
Ukraina armiyasi Kursk viloyatida shimoliy koreyalik ikki askarni asirga olgandi. Prezident Vladimir Zelenskiy 12-yanvar kuni ular so‘roqqa tutilgani aks etgan videoni e’lon qildi. So‘roq paytida KXDR askarlari qayerdaligini bilmasligi, ularga bu faqat o‘quv mashg‘uloti deb aytilganini ta’kidlagan.
KXDR jangchilaridan Shimoliy Koreyaga qaytishni xohlaysizmi, deb so‘ralganda, xavfsizlik xizmati kutilmagan javob olgan. Mahbuslardan biri vataniga qaytishni afzal ko‘rishi, ikkinchisi esa Ukrainada qolishni xohlashini aytgan. “Ukrainada yashashni xohlayman”, deya javob bergan u. Zelenskiyning so‘zlariga ko‘ra, Ukraina ularni Rossiyadagi ukrain asirlariga ayirboshlash doirasida vataniga qaytarishga tayyor.
Ukraina va G‘arb mamlakatlarining hisob-kitoblariga ko‘ra, Shimoliy Koreyadan 11 mingga yaqin harbiy xizmatchi Rossiya armiyasini qo‘llab-quvvatlash uchun Kursk viloyatida joylashtirilgan.
Izoh (0)