Rossiya AQSHning 398 nafar kongressmenini “qora ro‘yxat”ga kiritdi

Rossiya AQSHning Davlat dumasi deputatlariga nisbatan qo‘llagan sanksiyalariga javoban Kongress vakillar palatasining 398 nafar a’zosiga sanksiyalar joriy qildi.

“Qayd etilgan shaxslar, xususan, AQSH Kongressi quyi palatasining rahbariyati va qo‘mitalar raislari doimiy asosda Rossiya “stop-listi”ga kiritildi. Qonunchilik organining boshqa vakillariga ham spiker Nensi Pelosi kabi Rossiya Federatsiyasi hududiga kirishi taqiqlandi, Vashington sanksiyalariga javoban AQSHning kongressmenlariga bu kabi taqiqlar qo‘llanildi”, — deyiladi vazirlik bayonotida. AQSH vakillar palatasida jami 435 nafar kongressmen faoliyat olib boradi.

Shuningdek, Kanada parlamentining 87 nafar senatoriga ham AQSH kongressmenlariga qo‘llanilgan sanksiyalarning muqobili joriy etilgan, mazkur qarorga Ottavaning rossiyalik barcha senatorlarni “qora ro‘yxat”ga kiritgani sabab bo‘lgan. Kanada parlamentining senatida jami 105 o‘rin mavjud.

“Kanada tashqi siyosatidagi uzoqni ko‘zlamay qilingan harakat mamlakatning o‘ziga va Rossiya bilan munosabatlarga ziyon keltiradi, Moskva Ottavaning mazkur choralariga munosib javob qaytaradi”, — deyilgan Rossiya TIV bayonotida.

AQSH rossiyalik deputatlarga qarshi bir necha bosqichdan iborat sanksiyalar qo‘llagan. 11-martda Federal majlisning 12 nafar a’zosiga, jumladan Kommunistik partiya yetakchisi Gennadiy Zyuganov va Duma spikeri Vyacheslav Volodinga taqiqlar joriy etildi. AQSH davlat departamenti ularning Rossiya tomonidan DXR va LXR mustaqilligini tan olish ishlariga rahnamolik qilganini qayd etgan. 24-mart kuni 328 nafar deputat, shu bilan birga Davlat dumasining o‘zi alohida muassasa sifatida AQSH sanksiyalariga uchradi. Shu tariqa AQSH qora ro‘yxatlariga kamida 340 nafar deputat kiritildi, Davlat dumasidagi deputatlar o‘rni 450 tani tashkil qiladi (Jirinovskiy vafotidan keyin bir o‘rin vakant).

Kanada esa 24-mart kuni Ukraina hududiy yaxlitligi, suvereniteti va mustaqilligiga nisbatan qilingan zo‘ravonliklarga yo‘l qo‘ygani uchun 160 nafar rossiyalik senatorlarga sanksiyalar kiritgan.