Украинага қарши урушга жалб қилинган шимолий кореялик аскарларнинг 3 мингдан ортиғи ҳалок бўлди ва яраланди. КХДР ҳукумати асирликка тушмаслик учун аскарларидан ўзини портлатишни сўрамоқда. Бу ҳақда Reuters хабар берди.
Жанубий Корея разведкасига кўра, КХДР томонидан 300 га яқин аскар ҳалок бўлган ва 2700 киши яраланган. КХДР ҳукумати ўз аскарларини асирликдан қочиш учун ўзини портлатиб, ўз жонига қасд қилишга чақирмоқда.
“Асирга олинган аскарлар уларни Жанубий Кореяга кўчириш тўғрисида ҳеч қандай илтимос билдирмаган. Гарчи Сеул бундай сўровлар келиб тушса, Киев билан ҳамкорлик қилишга тайёр, дея хабар бермоқда Yonhap.
Украина армияси Курск вилоятида шимолий кореялик икки аскарни асирга олганди. Президент Владимир Зеленский 12 январь куни улар сўроққа тутилгани акс этган видеони эълон қилди. Сўроқ пайтида КХДР аскарлари қаердалигини билмаслиги, уларга бу фақат ўқув машғулоти деб айтилганини таъкидлаган.
КХДР жангчиларидан Шимолий Кореяга қайтишни хоҳлайсизми, деб сўралганда, хавфсизлик хизмати кутилмаган жавоб олган. Маҳбуслардан бири ватанига қайтишни афзал кўриши, иккинчиси эса Украинада қолишни хоҳлашини айтган. “Украинада яшашни хоҳлайман”, дея жавоб берган у. Зеленскийнинг сўзларига кўра, Украина уларни Россиядаги украин асирларига айирбошлаш доирасида ватанига қайтаришга тайёр.
Украина ва Ғарб мамлакатларининг ҳисоб-китобларига кўра, Шимолий Кореядан 11 мингга яқин ҳарбий хизматчи Россия армиясини қўллаб-қувватлаш учун Курск вилоятида жойлаштирилган.
Изоҳ (0)